Күнү-дьылы билгэлээччилэр сабаҕалааһыннарынан, Өлүөнэ мууһа урукку сыллардааҕар эрдэ устуоҕа. Бу туһунан СӨ Ил Дархана Айсен Николаев ыыппыт сүбэ-мунньаҕар эттилэр.
edersaas.ru
Ол курдук, Саха сиригэр Өлүөнэ мууһа 2 — 5 хонугунан эрдэ эстиэҕэ. Ленскэй уонна Өлүөхүмэ улуустарыгар ыам ыйын 5 — 11 күннэригэр, Өлүөхүмэ куорат аннынан ыам ыйын 11 — 13, Покровскай — Дьокуускай — Кангаласс учаастагынан ыам ыйын 14 — 19 күннэригэр, Сангаар бөһүөлэгинэн ыам ыйын 19 — 21 күннэригэр устара күүтүллэр.
Көмүөл этэҥҥэ ааһарын курдук, сыллата өрөспүүбүлүкэ өрүстэригэр мууһу хараардыы, эрбээһин үлэлэрэ тэрээһиннээхтик ыытыллаллар. Уу ресурсаларын федеральнай агентствотын Өлүөнэ сүнньүнээҕи ууга управлениетын чахчыларынан, былырыын 65 учаастакка 670,8 га иэннээх сири хараардыбыттара, оттон 12 учаастакка 77 килэмиэтир усталаах мууһу эрбэппиттэрэ.
Мууһу кэбирэтии үлэлэрин управление 2006 сылтан, Россия Ыксаллаах быһыыга-майгыга министиэристибэтин института бигэргэппит ньымаларын туһанан ыытар. Быйыл саас, эмиэ урукку сыллар курдук, 68 учаастакка 670,8 га сири хараардыахтара уонна 12 учаастакка 77 килэмиэтир мууһу эрбэтиэхтэрэ. Туһааннаах үлэни ыытыыга быйыл федеральнай бүддьүөттэн 30 мөлүйүөн 776 тыһыынчаттан тахса солкуобай көрүллүбүт.
Биһ. корр., edersaas.ru