Өлүөнэ өрүс мууһа Хаҥалас улууһун уонна Дьокуускай куорат аннынан хойуутук устар диэн СӨ Ыксаллаах быһыыга-майгыга министиэристибэтин пресс-сулууспата иһитиннэрэр.
Муус алын кирбиитэ Нам улууһун Граф биэрэгин сэлиэнньэтин аннынан устар, уу таһыма — 781, кутталлааах кирбии — 950 см. Үөһээ кирбиитэ Покровскай аннынан устар, уу таһыма — 730 см, кутталлаах кирбии — 1370 см. Дьокуускай аннынан уу таһыма — 603 см, кутталлаах кирбии — 990 см. Кангаласс аннынан уу таһыма — 967 см, кутталлаах кирбии — 1000 см. Муус уһуна — 163 км. Өлүөнэ мууһа Алдан өрүс учаастагынан ыам ыйын 20-21 күннэригэр, Сангаар-Эдьигээн учаастагынан ыам ыйын 20-22 күннэригэр ааһара күүтүллэр.
Бүлүү өрүс мууһа Кэбээйи оройуонунан ааһар. Алын кирбиитэ өрүс төрдүгэр тахсыбыт, үөһээ кирбиитэ Хатырык-Хомо сэлиэнньэлэр анныларынан устар, уу таһыма — 924 см, кутталлаах кирбии — 1220 см. Муус уһуна — 66 км.
Өлөөн улууһугар Өлөөн өрүс мууһа хойуутук устар. Аллараа кирбиитэ Сухана аннынан устар. Өрүс ыам ыйын 23-25 күннэригэр Булуҥ улууһунан ааһара күүтүллэр.
Халыма өрүс Орто Халыма оройуонунан устар. Аллараа кирбиитэ Лобуйанан ааһар. Уу таһыма үрдүүр, муус харар түбэлтэтигэр Орто Халыма намыһах сирдэрэ, аэропуорт көтөр балаһата ууга барыан сөп диэн сабаҕалыыллар.
Дьааҥы өрүс Дьааҥы уонна Усуйаана оройуоннарынан устар. Икки-үс күнүнэн төрдүгэр тиийэрэ күүтүллэр.
Индигиир өрүскэ муус хамсаабыта бэлиэтэннэ. Ыам ыйын 21-23 күннэригэр Уус-Ньара, Уус-Муома, Белай Гора аннынан хамсыыра күүтүллэр.
«Өрөспүүбүлүкэ өрүстэригэр биэс суһал бөлөх үлэлиир. Манна 65 киһи уонна 9 тиэхиньикэ баар. Ыам ыйын 19 күнүгэр Нам Партизанын аннынан мууһу эстэрдибит. Барыта 1000 киилэ эстэрэр тэрил туттулунна. Тоҕо тэптэрии түмүгэр харбыт муус алдьанна, билиҥҥитэ ханан да муус харбыта бэлиэтэ илик», — диэн Саха сиринээҕи ЫБММ сүрүн управлениетын начаалынньыга Павел Гарин иһитиннэрдэ.