Бүгүн, кулун тутар 31 күнүгэр, Ил Дархан Айсен Николаев «Саха» ГТРК (Россия-24) эпииригэр «Прямой разговор» биэриигэ кыттынна. Көрөөччүлэр бэрт интэриэһинэй ыйытыылары биэрдилэр.
Мэҥэ Хаҥалас улууһуттан Анна Петрова быһа сибээскэ тахсан: «Өлүөнэ муостатын тутууга бульдозерист идэлээх кэргэним үлэҕэ хайдах киириэн сөбүй?» — диэн ыйытта. Ил Дархан: «Муоста тутуутугар 1000 үлэ миэстэтэ тахсыаҕа. Олохтоох хампаанньалары уонна олохтоох каадырдары үлэлэтиэхпит. Нэһилиэнньэ дьарыктаах буолуутун киинигэр суруттарыаххытын сөп», — диэтэ.
Тааттаттан оҕоҕо бэриллэр «үүт куукунатыгар» үчүгэй хаачыстыбалаах үүт тоҕо кэлбэтин, тоҕо хойутуурун ыйыттылар. Онуоха Ил Дархан бэҕэһээ буолбут социальнай ситимнэр нөҥүө быһа сибээскэ маннык ыйытыылар киирбиттэрин эттэ, «бу кыһалҕаны быһаарыам» диэн хоруйдаата.
«Ыһыах буолуо дуо?» диэн ыйытыыга бэрэсидьиэн үгүс дьону үөрдэ: «Ыһыах буолуоҕа, дьаҥ кэнниттэн Muus uSTAR диэн улахан бэстибээли тэрийдибит. Онон этэҥҥэ буоллаҕына, бу сайын ыһыахтыахпыт», — диэтэ.
Быһа биэрии кэмигэр салгыы маннык ыйытыы киирдэ: «Кыһыммыт үгүс экстремаллары угуйар. Хаһан Тымныы Полюһугар дьон холкутук сынньанар усулуобуйалаах туристическай баазалар тутуллуохтарай?». Айсен Сергеевич манна: «Өймөкөөн, Дьааҥы дьону угуйар. Туристическай бааза инфраструктуратын оҥоруохтаахпыт. Биһиги дьоҕус биисинэһи өйүүбүт, онон бу биисинэс сайдыахтаах», — диэн эттэ.
Ульяна Захарова, edersaas.ru
Хаартыска — sakha.gov.ru