Кулун тутар 23 күнүгэр Ленинградскай уобалас Судаарыстыбаннай гидрологическай институт сүрүн экспериментальнай базатыгар Өлүөнэ өрүһү туоруур муоста бырайыага бастакы натурнай чинчийиини ааста. Сүрүннээн көмүөл кэмигэр муус ааһыытын чинчийдилэр. Бырайыакка туох да итэҕэс баара көстүбэтэ диэн “ВИС” бөлөх пресс-сулууспата иһитиннэрэр.
Муоста тутуллар сиринэн өрүс кытылын, түгэҕин үтүгүннэрэн оҥорон, хас да сыллаах уу кэлиитин, муус хамсааһынын учуоттаан, чинчийиини ыыппыттар. Ону тэҥэ, эспиэрдэр муоста тутуллуутун – тааһынан кутууну, эстакадалары, араас механизмнарын бэрэбиэркэлээтилэр.
Салгыы бу сайын аэродинамическай тургутуктар ыытыллыахтара. Муоста генеральнай бырайыактааччыта – Санкт-Петербурдааҕы Гипростроймост института. Бу хампаанньа Крым муостатын, Владивостокка баар Золотой Рог муостатын бырайыактаабыта. Бырайыагы “Ахсыс концессионнай хампаанньа” үлэлэтэр. Бу хампаанньаны “Ростех” корпорация уонна “ВИС” бөлөх салайаллар. Үп-харчы партнера — “Сбербаан”.
Ангелина Васильева, “Саха сирэ” хаһыат, edersaas.ru