Сотору кэминэн Дьокуускай куорат киһи билбэт гына уларыйыаҕа, тупсуоҕа. Былырыын Айсен Николаев 2032 сылга диэри киин куорат сайдыытын туһунан ыйааҕы таһаарбыта.
Ол курдук, Өлүөнэ өрүс түгэҕин дириҥэтэр үлэлэри, халаан уутуттан көмүскүүр тутуулары, даамбаны, 203-с түөлбэттэн Табаҕа бөһүөлэгэр диэри субуллар кытыл суолун (манна бэлисэпиэт суола эмиэ баар буолар), уо.д.а. оҥоруохтара.
—Дьокуускайга өрөспүүбүлүкэ нэһилиэнньэтин үс гыммыт биирэ олорор. Онон ирбэт тоҥҥо турар киин куорат аныгылыы, тупсаҕай көстүүлээх, олорорго табыгастаах буолуохтаах. Онон хас биирдии олохтооҕо уларыйыылары билэрин, сыаналыырын ситиһэр соругу биһиэхэ Ил Дархан туруорда, — диэн бырабыыталыстыба бэрэссэдээтэлэ Андрей Тарасенко эттэ. Кини тутуллуохтаах сирин-уотун тиийэн көрдө-иһиттэ, исписэлиистэри кытары кэпсэттэ.
2022 сыл ыам ыйыттан геодезическэй үлэлэр номнуо саҕаланыахтара. Ол кэнниттэн халаантан көмүскүүр инженернэй тутуулары былааннаан, ааҕан-суоттаан тутуохтара.
Ону тэҥэ, куорат киин уулуссалара, болуоссаттара өрөмүөннэнэн, төрдүттэн уларыйыахтара, уопсастыбаннай тырааныспар паарката саҥардыллыаҕа. Тэриллибитэ 390 сыла туолар Дьоллоох Дьокуускай биллэ тупсуоҕа, уларыйыаҕа, этэргэ дылы, «сирэйдиин сырдыаҕа».
Ангелина Васильева, “Саха сирэ” хаһыат, edersaas.ru
Хаартыска: sakhagov.ru