Бүгүн, атырдьах ыйын 4 күнүгэр, СӨ Тырааныспар уонна суол хаһаайыстыбатын миниистирэ Владимир Сивцев Өлүөнэ күргэтин тутууга, Дьокуускай авиапордун балаһатын өрөмүөнүн хаамыытыгар, өрөспүүбүлүкэҕэ суолу тутуу үлэтигэр суруналыыстарга пресс-кэмпириэнсийэ биэрдэ.
Тэрээһин «Сахамедиа” тэрийбит былаһааккатыгар ыытылынна. Владимир Сивцев Өлүөнэ муостатын тутууга 1200 үлэ миэстэтэ тахсыахтааҕын уонна онно улахан аҥаарыгар олохтоох нэһилиэнньэ кыттыахтааҕын туһунан кэпсээтэ.
«Өлүөнэ муостатын тутууга 1200 киһи үлэлиэхтээҕэ быһаарылынна. Мантан улахан аҥаара олохтоох дьон буолуохтара. Бу боппуруоска олохтоох тутар хампаанньалары кытта көрсөн кэпсэттибит. Кинилэр үксүн тутар-таҥар үлэҕэ сылдьыахтара», — диэн Владимир Сивцев кэпсээтэ.
Санатар буоллахха, бу сүүнэ күргэ үс федеральнай, биэс эрэгийиэннээҕи суоллары, Амур-Саха сиринээҕи тимир суолу, өрүс пуордун уонна аан дойду таһымнаах аэропорду ситимниир улахан суолталаах. Итини тэҥэ, муоста үлэҕэ киирдэҕинэ, Саха сирин нэһилиэнньэтэ кэлэригэр-барарыгар улахан чэпчэтиини оҥоруоҕа. Быһа барыллаан ааҕыынан, сылга таһаҕаһы тиэйии 6 мөл. туоннанан уонна дьон кэлиитэ-барыыта 8 мөл. киһинэн улаатара күүтүллэр.