Өлүөнэ эбэҕэ төлөпүөнүн алҕас түһэрээт, суотабайын «эккирэппит» киһини быыһаатылар

Өлүөнэ эбэҕэ паром пассажира айылҕа кэрэтин уста иһэн, төлөпүөнүн ууга түһэрэн баран, толкуйдуу барбакка, тымныыга ууга ыстаммыт.

Хата, дьолго, ууга булумахтана сылдьар киһи аттыгар мотуордаах оҥочо баар буолан биэрбит. Ууга түһэн моһуогурбут киһини оҥочо пассажирдара хостоон ылбыттар. Эдэр киһи итиригэ суох. Балыыһаланартан акаастаммыт. Төлөпүөнүн аһыйан айманар аҕай үһү.

Бу туһунан Уһук Илиннээҕи РФ ИДьМ тырааныспарга управлениетын пресс-сулууспата СИА-ҕа иһитиннэрдэ.  Пассажирдар видеоҕа уһулбуттарыттан сылыктаатахха, төлөпүөнүн ууга алҕас түһэрэн баран, ону ылаары ыстаммыт.

Елена ПОТОЦКАЯ, «Саха сирэ» хаһыат.  

Хаартыска уонна видео — СИА.