Өлүөнэҕэ көмүөл Кэбээйи оройуонугар тиийдэ

Бөлөххө киир:

СӨ быыһыыр сулууспата иһитиннэрбитинэн, ыам ыйын 25 күнүгэр сарсыарда 7 чааска Өлүөнэ өрүскэ муус Нам, Кэбээйи, Дьокуускай куорат сиринэн-уотунан устар. Муус алын кырыыта Кэбээйи улууһун Сангаар бөһүөлэгиттэн 20 км сиргэ баар. Уу таһыма – 968 см, кутталлаах таһыма – 1150 см. Муус хойуутук устар.

Нам улууһугар Арбыҥҥа – уу таһыма 758 см (кутталлаах таһым 897 см), Тумулга – 749 см (кутталлаах таһым – 715 см), Бөтүҥҥэ – 785 см (кутталлаах таһым – 711 см), Аппааныга – 958 см (кутталлаах таһым – 998 см), Партизаҥҥа – 613 см (632 см), Үөдэйгэ – 662 см (800 см).

Көмүөл үөһээ кырыыта Дьокуускай аттынааҕы Хаҥалас хайатын аттынан баар, уу таһыма – 1011 см (кутталлаах таһым – 1000 см). Дьокуускай аттынан уу таһыма 678 см (827 см), муус аҕыйах.

Өлүөнэҕэ көмүөл уһуна 312 км. Суукка иһигэр муус 155 км сыҕарыйда. Харбыт сиринэн дэлби тэптэриилэр оҥоһуллан, Нам улууһугар уу таһыма түһэн эрэр.

Алдан өрүс мууһа Уус Алдан уонна Кэбээйи улуустарынан устар. Муус алын кирбиитэ Өлүөнэҕэ тиийдэ. Үөһээҥҥи кырыыта Батамай сэлиэнньэтин аттынан баар, уу таһыма – 954 см (1140 см), көмүөл уһуна 10 км.

Бүлүү өрүс мууһа эмиэ Өлүөнэҕэ тиийдэ. Суукка иһигэр муус 30 км сыҕарыйда.

Амма өрүскэ уу таһыма 823 см (925 см). Ыам ыйын 26-27 күннэригэр халаан иккис долгуна кэлэн, уу таһыма үрдүөн сөп.

Яна өрүскэ муус Сартаҥ уонна Адыаччы аттынан устар. Баатаҕай аттынан уу таһыма – 410 см (970 см).

Халыма өрүскэ муус Аллараа Халыма оройуонун сиринэн устар. Ыам ыйын 25 күнүгэр 7 суукка эрдэлээн, Черскэй бөһүөлэгин аттынан муус эһиннэ. Уу таһыма – 330 см.

Зырянка аэропордун көтөр-түһэр балаһата 10% ууга барда. Уу таһыма – 600 см (850 см).

Индигирка өрүскэ Уус-Муома-Белая Гора учаастагынан муус хамсаата. Сууккаҕа уу 10-40 см эбиллэр.

Ангелина Васильева, “Саха сирэ” хаһыат, edersaas.ru

Хаартыска: sakhagov.ru.

+1
0
+1
0
+1
0
+1
0
+1
0
+1
0
+1
0