Ыам ыйын 7 күнүнээҕи туругунан Өлүөнэ мууһа Крестовскай анныгар кэлэн иҥиннэ. Уу таһыма хаһааҥҥытааҕар да намыһах буолан, муус салгыы устубакка турар.
Анивера Акимова, «Саха сирэ» хаһыат,https://edersaas.ru
Витимҥэ муус хамсаата даҕаны икки күнүнэн Ленскэйгэ кэлээччи. Ол эрээри быйыл хартыына олох атын буолла. Балаһыанньаны билсэ таарыйа Уу ресурсаларын федеральнай агентствотын Өлүөнэ сүнньүнээҕи ууга управлениетын салайааччытын солбуйааччы Мирон Эртюковы кытары төлөпүөнүнэн сибээскэ тахса сырыттым. Онуоха: «Билигин Ленскэйгэ баарбыт. Пеледуй аннынан уу таһыма 355 см, Крестовскайынан 324 см. Билгэлээһин туолбата. Уопсайынан, хаһан да буолбатах балаһыанньа үөскээтэ. Билигин Ленскэйгэ ардах түһэн эрэр. Инньэ гынан ыам ыйын 8 күнүгэр муус хамсыа диэн сабаҕалыыбыт. Дьэ хайдах буолар?!«, — диэн кэпсээтэ.
Дьиҥэр, күнү-дьылы билгэлээччилэр сабаҕалааһыннарынан, Өлүөнэ мууһа Өлүөхүмэҕэ ыам ыйын 7, Покровскайга – 11, оттон Дьокуускай куорат аннынан 12 күннэригэр ааһыахтааҕа.
Былырыыҥҥыны кытары тэҥнээн көрдөххө, Витимҥэ муус ыам ыйын 8-гар хамсаабыта. Дьокуускайынан ыам ыйын 13 күнүгэр ааспыта.
Бүгүн Ленскэйгэ. Видеону көрүҥ.
Анивера Акимова, «Саха сирэ» хаһыат, edersaas.ru