Өлөөн баһылыга Лена Иванова: «Бэрэсидьиэнтэн элбэх үчүгэй сонуну иһиттибит»
Бэҕэһээ, ахсынньы 23 күнүгэр, РФ Бэрэсидьиэнэ Владимир Путин пресс-кэмпириэнсийэтэ буолбута. Бу тула Өлөөн улууһун баһылыга Лена Степановна Иванова санаатын үллэстэр:
— Владимир Владимирович Путин пресс-кэмпириэнсийэтин сэргээтим, олуһун астына иһиттим. Дойдубут салайааччыта эрэллээх, холку саҥатын истэр, дьоҥҥо-сэргэҕэ инники олоххо эрэли үөскэтэр. Биир бэйэм үс түгэни биһирии иһиттим. Бастатан туран, уопсастыбаҕа ковид, вакцинация тула хайдыһыыны намыратар ис хоһоонноох этиилэрэ олус сөптөөх кэмҥэ этилиннилэр дии саныыбын. Дьону эбии кытаанах миэрэлэринэн сордообокко, холкутук быһааран иһэр туһугар эппитин кытта мин сөпсөһөбүн. Биһиги улууспутугар коронавирустан сылтаан 21 киһи суорума суолланна, онтон 20-тэ вакцина ылбатах дьон. Итини дьон көрөн, өйдөөн эрэр.
Иккиһинэн, бүддьүөт социальнай хайысхалаах буолар диэбитин сөбүлүү иһиттим. Ордук оҕолоох дьоҥҥо көмөнү сайыннаран, биир систиэмэҕэ холбуохпут диэбитэ сыаналаах, хайаан даҕаны итинник дьаһаныы баар буолуохтаах этэ.
Хаарбах дьиэттэн көһөрүү бырыгыраамата салгыы үлэлиирин, уһатылларын туһунан этиитэ олус сөп. Бу бырайыак норуокка улахан туһаны аҕалла. Аҥардас биһиги улууспутугар быйыл хас даҕаны толору хааччыллыылаах дьиэ тутулунна — 16 кыбартыыралаах дьиэ Харыйалаахха, биир оннук 16 кыбартыыралаах дьиэ Өлөөҥҥө уонна Дьилиҥдэҕэ 6 кыбартыыралаах дьиэлэри тутан, дьону хаарбах дьиэттэн көһөрбүппүт. Кэлэр сылга таас дьиэлэри туттарар былааннаахпыт.
Онон дойдубут бэрэсидьиэнин пресс-кэмпириэнсийэтэ бэрт үчүгэй сонуннары аҕалла, дойдубут салгыы сайдарыгар эрэли үөскэттэ.