Үгүс дьон чэпчэки сыаналаах дьиэни атыылаһаары дьиэ тутуллуон иннинэ өлүүлэһэн тутуу дуогабарын түһэрсэн, харчыларын эрдэ уган кэбиһэр идэлээхтэр. Онтон тутааччы ол харчыны ылан баран араас төрүөтүнэн дьиэни ситэри туппатаҕына, сэттэ сиринэн үҥсүһүү-харсыһыы саҕаланар. Бу маннык мөкү көстүү судаарыстыбаҕа «төбө ыарыыта» буолбута ыраатта.
edersaas.ru
Ол иһин нэһилиэнньэ харчытын харыстыыр, суобаһа суох тутааччылар угаайыларыгар киирэн биэрбэт туһугар өлүүлэһэн тутуу сокуонугар 2019 сыл от ыйын 1 күнүттэн кэккэ уларыйыы киирдэ. Бу ыйтан тутуу хампаанньалара өлүүлэһэн тутууга киирбит дьон харчыларын боломуочуйалаах баан тыытыллыбат эскроу счетугар угар буолуохтара. Кинилэр ол харчыны дьиэни тутан бүтэрдэхтэринэ биирдэ устар бырааптаахтар.
Саҥа ирдэбил бэрээдэгин туһунан бүгүн, от ыйын 9 күнүгэр, Судаарыстыбаннай тутуу уонна дьиэни-уоту кэтээн көрүү управлениетын салайааччы Наталья Чусовская билиһиннэрдэ.
«Тутааччылар баантан кирэдьиит ылан, дьиэни тутан таһаарыахтара. Оттон өлүүлэһэн тутууга киирбит дьон эскроу счекка угуллубут харчыларын страховкалыахтара. Өскөтүн тутуу хампаанньата, эбэтэр баан моҥкуруут бардаҕына, 10 мөлүйүөн солкуобайга диэри төнүннэриэхтэрэ. Билигин Дьокуускай куоракка дьиэ сыаната ортотунан 5 мөлүйүөн солкуобай, онон хас биирдии киһи өлүүлэһэн тутууга укпут харчытын дьиэтэ тутуллубатаҕына, төттөрү ылар кыахтаныаҕа», — диэн быһаарда кини.
Күн бүгүн өрөспүүбүлүкэҕэ 7066 өлүүлэһэн тутуу дуогабара оҥоһуллубут, онтон 60 урукку бэрээдэгинэн эскроу счет арыйбакка тутуллуон сөп. Тутуу хампаанньаларыттан ДСК бастакынан эскроу счет арыйан уонна кирэдьиит ылан, Воинская уулуссаҕа элбэх кыбартыыралаах дьиэ тутуоҕа. Тутааччылары кытта Сбербаан, ВТБ, Газпромбаан, «Банк ДОМ РФ» үлэлииргэ бэлэмнэр.
Өскөтүн дьиэ тутуллан бүтүөхтээх болдьоҕуттан алта ый хойутаатаҕына, кыһалҕалаах эбийиэк ахсааныгар киириэҕэ. Дьиэ-уот тутуутугар биир кэлим реестр оҥоһуллан, дьиэни кэмигэр тутан бүтэрбэт тутааччылары туһунан испииһэктиэхтэрэ. Оттон өлүүлэһэн тутууга киирбит дьон сайабылыанньа суруйа сатаабакка, харчыларын төттөрү ылар кыахтаныахтара. Билиҥҥи туругунан, өрөспүүбүлүкэҕэ 21 эбийиэк тутуллан бүтэр болдьоҕуттан алта ыйтан ордук хойутаан иһэр. Кинилэри эппиэтинэскэ тардарга бэрээдэги көрөр уорганнар үлэлииллэр.
Өлүүлэһэн тутууга киириэн баҕалаах дьон тутааччы хайдах үлэлиирин, тутууга көҥүл ылар докумуона баарын-суоҕун “Наш.дом.рф” сайтка киирэн бэрэбиэркэлиэхтэрин сөп.
Марианна Тыртыкова, «Саха сирэ», edersaas.ru