Тохсунньу 1 күнүттэн элбэх кыбартыыралаах дьиэ тутуутугар өлүүлэлэһэн киирээччилэр бырааптарын көмүскүүр өссө биир сокуон олоххо киирдэ.
Аграфена КУЗЬМИНА, «Саха сирэ» хаһыат, https://edersaas.ru/
Бу сокуон чэрчитинэн, тутааччылар сайтарыгар туох баар докумуоннарын барытын, ол иһигэр тутууга харчыларын укпут дьоннору кытары түһэрсибит дуогабардарын, тутуу хаамыытын көрдөрөр хаартыскаларын, киллэриэхтээхтэр.
Ону сэргэ бу сокуоҥҥа олоҕуран моҥкуруут барбыт эбийиэктэргэ харчыларын укпут дьон ороскуоттарын хайдах эмэ гынан толуналларыгар анал фонда тэрилиннэ. Бу фондаҕа тутааччы тэрилтэлэр тутууга өлүүлэһэн киирии дуогабарынан көрөн харчыны угуохтара. Сокуоҥҥа сурулларынан, бу угар харчылара дуогабарга ыйыллыбыт сууматтан 1 % үрдээбэт.
Маны таһынан тутууну хонтуруоллуур, бэрэбиэркэлиир уорганнар тутуу хаамыытын, манна угуллубут харчы ханна, туохха туһаныллыбытын көрөллөрүгэр боломуочуйалара кэҥээн биэрдэ. Санатан эттэххэ, тэрилтэ дьоҥҥо күлүүһү биэрэригэр хайаатар да дьиэ тугунан тутуллубутун, ону көрүү-харайыы туһунан толору информацияны биэриэхтээх. Өскөтүн эбийиэк ирдэбиллэргэ эппиэттээбэт буоллаҕына, өлүүлэһэн киирбит киһи тэрилтэни кытары кэпсэтэн эбэтэр сууттаһан ол алҕаһын көннөттөрөр бырааптаах. Манна сыһыаран эттэххэ, саҥа киирбит эбийиэги тутааччы тэрилтэ биэс сылга мэктиэлээн (гарантиялаан) туттарыахтаах.
Тутууга өлүүлэһэн киирээччилэр бырааптарын биһиэхэ Судаарыстыбаннай тутууну уонна дьиэни хонтуруоллуур управление көмүскүүр. Управление сайтыгар киирэн ханнык тэрилтэ ханна, туох эбийиэги тута сылдьарын билсиэххитин, ону сэргэ тутууну кэмигэр киллэрбэтэх эбэтэр олох да туппатах тутааччылар испииһэктэрин көрүөххүтүн сөп. Өскөтүн аҕыйах сыллааҕыта үгүс тэрилтэ дьонтон харчыларын ылан баран, кураанаҕы куустарбыт эбит буоллахтарына, кэлиҥҥи үс сыл иһигэр манна өрөспүүбүлүкэ салалтата орооһон бэрээдэк олохтонно. Управление дааннайынан, билигин өрөспүүбүлүкэ үрдүнэн, үһүс кыбаартал түмүгүнэн, барыта 68 тэрилтэ өлүүлэһэн тутууга үлэлэһэ сылдьар. Биэс тэрилтэ, (“Черов и К”, “Теплосервис”, “Стерх”, “Макрос”, “Северная строительная компания”) эбийиэктэрин кыайан олоххо киллэрбэтэх. “”Ессо-стиль“, Макрос”, “ССК” тэрилтэлэр моҥкуруут барбыттарын туһунан сайабылыанньа киллэрэн сытыараллар.
Аграфена КУЗЬМИНА.