Лүксүгүҥҥэ оскуола-саад тутулунна
Олох-дьаһах

Лүксүгүҥҥэ оскуола-саад тутулунна

Кэбээйи улууһугар, Лүксүгүҥҥэ, саҥа оскуола-саад тутулунна. Онон олохтоохтор үөрүүлэрэ муҥура суох.

Лүксүгүн олохтоохторун ыра санаалара туолла. Сэтинньи 3 күнүгэр 35/18 миэстэлээх оскуола-саад   үөрүүлээх быһыыга-майгыга арыллыаҕа. Бу туһунан СӨ Тутуу министиэристибэтин пресс-сулууспата иһитиннэрдэ.

Саҥа дьиэ дьэндэйэн, харахха тута быраҕыллар. Толору хаачыллыылаах аныгы тутуу улахана, киэҥэ-куоҥа, сырдыга олохтоохтору үөрдүөн үөрдэр.

«Бу сылы быһа нэһилиэк олохтоохторо тутууну судургутутар, кыратык да буоллар тэтимирдэр туһуттан, субуотунньуктарга көхтөөхтүк кытыннылар.  Дьиэ турар сирин-уотун ыраастаан, өрө тардан, бөҕүн-саҕын хомуйан, ситэрэр-хоторор үлэлэргэ кыттан, нэһилиэк сэргэхтик олордо. Улахан дьон бука бары, үөрэх саҥа кыһатын үлэҕэ киллэрэ охсоору, сүргэлэрэ улаханнык көтөҕүллэн көмөлөстүлэр, өйөбүл буоллулар«, — диэн Арыктаах нэһилиэгин баһылыга Ангелина Сивцева үөрүүтүн үллэстэр.

Үлэҕэ харгыстары туоратан, тутуу түмүктэннэ. Аныгы үйэ ирдэбилигэр толору эппиэттиир оскуола-саад дьэндэйэн таҕыста.

Лүксүгүҥҥэ уопсайа 251 киһи олорор, итинтэн 49 — 1-9 кылааска үөрэнэр оҕолор. Оскуолаҕа киириэн иннинээҕи саастаахкырачаана — 30.  Саҥа оскуола-саад нэһилиэк биир саамай күргүөмнээх, сэргэх сиринэн буолара саарбахтаммат.

«Лүксүгүн олохтоохторун уонна тус бэйэм ааппыттан Алексей Дмитриевич Петров салайааччылаах «Мин Сахам сирэ — XXI үйэҕэ» үтүө дьыала хамсааһыныгар махталбын тиэрдэбин.  Оскуола бу хамсааһын бырагырааматынан үбүлэммитэ. Ону сэргэ,»Кэбээйи муниципальнай оройуона» МТ уонна нэһилиэк дьаһалтата көмөлөстүлэр. «Тиит» ХЭУо генеральнай дириэктэригэр Николай Теплоуховка уонна тэрилтэ бары кэлэктиибигэр тулуурдарын, дьулуурдарын, кыһамньыларын, үлэлэригэр эппиэтинэстээх сыһыаннарын уонна сатабылларын иһин ураты махталбытын тиэрдэбит«, — диэтэ нэһилиэк баһылыга.

 

Алексей Петров: «Суола-ииһэ уустук, эрэйдээх нэһилиэктэргэ социальнай инфраструктураны сайыннарарга, тутуулары ыытарга олохтоох көҕүлээһини өйүүллэригэр СӨ Бырабыыталыстыбатыгар махтанабын. Бу курдук айымньылаах үлэҕэ, сыалга-сорукка министиэристибэлэр, биэдэмистибэлэр, улуустар, нэһилиэктэр, тутуу тэрилтэлэрэ, нэһилиэк олохтоохторо бииргэ, көмөлөөн ситиһиилэрин дьон-сэргэ сүрэҕэр чугастык ылынар. Оскуола-саады тутууга «Тиит» ХЭУо  үтүө суобастаах үлэтин уонна Лүксүгүн олохтоохторо санаалара кынаттанан, сомоҕолоһон туран көмөлөһүүлэрин үөрэн, киэн туттан туран бэлиэтиир тоҕоостоох. Манна даҕатан, тиэхиньикэ сылдьарыгар уонна оскуоланы тутарга матырыйааллары тиэйэн аҕаларга, эргэ мас муостаны лүксүгүннэр бэйэлэрин күүстэринэн бөҕөргөтөн оҥоруулара, бу дойдуларын туһугар ис сүрэхтэриттэн бэриниилээхтэрин көрдөрөр диэн сөҕөбүн, хайгыыбын. Бу норуот өйүн-санаатын күүһэ, сомоҕолоһуута«, — диэн санаатын үллэһиннэ.

0
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

8 + 1 =