Орто Халыма улууһун I Хаҥалас нэһилиэгэр баар «Өлөөкө Күөл сылгы собуота» хааһына тэрилтэтин ынах сүөһүнү иитэр пиэрмэтигэр биэс ыанньыксыт үлэлиир.
edersaas.ru
Кинилэр 74 ынахтан 58 470 киилэ үүтү ыаннар, сыл аҥаардааҕы былааннарын 110 % толорон иһэллэр. Билиҥҥи туругунан, күҥҥэ 610,1 киилэни, ол иһигэр М.П.Михайлова 144,3, К.Н.Ноговицына 120, М.Н.Винокурова 124, А.П.Слепцова 108,6, И.И.Сухомясов 113,1 киилэ үүтү ылаллар. 2020 сыл бастакы аҥаарыгар 50 500 киилэни ыыр сорудахтаахтарын 58 470 киилэни ыан, былааннарын куоһардылар.
Урукку курдук, ыанар ынах пиэрмэтэ сайылыкка көспөт, бөһүөлэккэ сайылыыр. Бостуук Н.О.Созонов ыамы көтүппэккэ, ынахтары кэмигэр аҕалан, ыанньыксыттарга күүс-көмө буолар. Үүтү А.Д.Созонова астыыр сыахха эрийэн, сүөгэй, суорат уонна арыы оҥорон, маҕаһыыҥҥа туттарар. Онон нэһилиэнньэ үрүҥ аһынан төгүрүк сыл хааччыллар. Сайын бырдахтан, куйаастан саллыбакка, кыһын тымныыттан, хараҥаттан иҥнибэккэ, сынньалаҥа суох сыралаах үлэлэригэр тулууру баҕарабыт. Кинилэр уустук үлэҕэ ситиһиилэринэн киэн туттабыт.
Күннэй Винокурова, 14 №-дээх «Эдэр кэрэспэдьиэн» пост юнкора, «Саха сирэ» edersaas.ru