Быйыл Өлүөхүмэҕэ ыытыллыахтаах Олоҥхо ыһыаҕын тырааныспарка өрөспүүбүлүкэтээҕи хамыыһыйатын видео-кэмпириэнсийэнэн мунньаҕа буолла.
Мунньахха Олоҥхо ыһыаҕар дьону таһыы боппуоһун көрбүттэр. Трассанан барыыны көҥүллүөхтэрин сөп диэн кэпсэппиттэр. Уу тырааныспарын сырыытын элбэтэргэ этиини киллэрбиттэр. Ону тэҥэ, тэрээһини ыытыыга туһаныллар тырааныспары, тэрили илдьии боппуруоһун быһаарсыбыттар. Бу туһунан улуус дьаһалтатын пресс-сулууспата иһитиннэрэр.
Мунньахха СӨ тырааныспарка уонна суол хаһаайыстыбатыгар миниистирин солбуйааччы Алексей Филиппов, СӨ култууратын уонна духуобунай сайдыытын миниистирин бастакы солбуйааччы Владислав Левочкин, Олоҥхо тыйаатырын дириэктэрин уопсай боппуруоска солбуйааччы Мария Турантаева, Өлүөхүмэ улууһун баһылыгын социальнай боппуруостарга солбуйааччы Оксана Саввинова, улуус инфраструктураҕа уонна инвестицияҕа сайдыытын управлениетын начаалынньыга Петр Федоров, өрүс тырааныспарынан таһыы оператордара кыттыбыттар.