«Саха сирин Украината» дэммит, өҥ буордаах Өлүөхүмэ улууһа бурдугу 534 гектарга, сүөһү сиир култууратын 717 гектарга ыһар, хортуоппуйу 844 гектарга оттон аһаҕас буорга үүнэр оҕуруот аһын 43 гектарга олордор былааннаах.
edersaas.ru
– Бөдөҥ хаһаайыстыбалартан бурдугу «Поиск» тыа хаһаайыстыбатын научнай-производственнай кэпэрэтиибэ 300 гектарга (сэлиэһинэйи 75, ньэчимиэни 175, эбиэһи 50 гектарга) ыһар былааннаах, – диир Өлүөхүмэ улууһун сүрүн агронома Сардаана Никитина. – «Өлүөхүмэ кыладабыайа» хааччахтаммыт эппиэтинэстээх тэрилтэ 50 гектарга ньэчимиэни, Судаарыстыбаннай сортобуой учаастак 35,5 гектарга (сэлиэһинэйи 10, ньэчимиэни 50, эбиэһи 79 гектарга), оттон бааһынай хаһаайыстыбалар холбоон 149 гектарга (сэлиэһинэйи 20, ньэчимиэни 50, эбиэһи 79 гектарга) ыһыахтаахтар. Ыһыы сиэмэтин хааччыйыыга үс тэрилтэни кытары дуогабардаахпыт. Ол быһыытынан, бэйэбит Сортобуой учаастакпыт 2 т сэлиэһинэй, 1 т ньэчимиэн, 5 т эбиэс сиэмэтин биэрдэ. «Туймаада» агрохолдиҥҥа 70 т бурдук, 2 т Судан отун, 0,8 т кукуруза, 0,45 т подсолнух сиэмэтин сакаастаабыппытыттан 59 т аҕалла, ордугун уу суолунан ыытар. «Птицевод Иванов» ХЭТ 20 т эбиэһи эмиэ уунан аҕалар.
Биллэрин курдук, ханнык баҕарар үүнээйи сир туһалаах эттиктэрин иҥэринэн үүнэр. Ол иһин, бааһына буорун байытар, уоҕун күүһүрдэр ирдэнэр. Хаһаайыстыбалар бааһыналарыгар 1766 т органическай уоҕурдууну киллэрэн тураллар. Оттон минеральнай уоҕурдууну сакаастаан аҕалтарабыт: «СахаАгроС» кэпэрэтиип 15 т азофосканы, «Россельхозкиин» 400 л гуматы аҕалбыттара. «Туймаада» агрохолдинг 120 т азофосканы, диаммофосканы аҕалла, аны 90 т уунан аҕалыахтаах.
Дьэ ити курдук, тыа хаһаайыстыбатын тэрилтэлэрэ коронавирустан сылтаан сэрэхтээх буолуу дьаһалларын күүһүрдэн, хааччахтааһын миэрэлэрин киллэрэн тураннар, үлэ тиһигин тохтоппоттор. Сиртэн үүнээйини ылыыга идэтийэр хаһаайыстыбалар дьылы быһаарар сүрүн түбүктэрэ – ыһыы үлэтин тэрээһинэ саҕаланна.
Раиса Сибирякова, «Саха сирэ» edersaas.ru