Быйыл Өлүөнэ өрүс мууһун арыый эрдэлээн киллэриэҕэ диэн сабаҕалыыллар. Ону кытта өрүс кытыытыгар сытар улуустар бэлэмнэммитинэн бараллар. Өлүөхүмэ улууһугар бэлэмнэнии хайдаҕый?
Улуус дьаһалтатын гражданскай оборонаҕа уонна ыксаллаах быһыыга кылаабынай исписэлииһэ Петр Торговкин иһитиннэрбитинэн, Өлүөхүмэ улууһугар уу ылыан сөптөөх, уопсайа, 10 нэһилиэк баар. Онтон уу кэлэр түгэнигэр бастакынан ууга барар ордук кутталлаахтарынан биэс нэһилиэги ааттыыр. Өлүөнэ өрүс кытыытыгар сытааччылартан Кыыллаах нэһилиэгин, 1 Нөөрүктээйи, 2 Нөөрүктээйиттэн аҕыйах дьиэ, Олоохуна өрүскэ Троицкай сэлиэнньэтэ, Токко өрүскэ Тээнэ национальнай нэһилиэгэ ууга барар кутталлаахтарынан биллэллэр.
Улахан болҕомтону арыыга сытар буолан Кыыллаах нэһилиэгэр уураллар. Аҕыйах хонуктааҕыта улуус баһылыга Николай Харбин тыа хаһаайыстыбатын управлениетын начаалынньыга Федор Чердоновы кытта миэстэтигэр тахса сылдьыбыттара. “Бу күннэргэ нэһилиэктэринэн миэстэтигэр тиийэн көрөттөөтүбүт. Бүтэһигин I Нөөрүктээйигэ, II Нөөрүктээйигэ сырыттыбыт. Манна быстах кэмҥэ дьону түһэрэр пууннар, сылгыны, сүөһүнү хаайар сирдэр, төһө бэлэмнэрин барытын бэрэбиэркэлээтибит.
Сүөһүнү, сылгыны хаайар сирдэрин көрдүбүт. Уматык саппааһа баар. Быстах кэмҥэ дьону түһэрэр сирдэрэ барыта бэлэм. Бородууктанан хааччыйыыга урбаанньыты кытта дуогабардаспыттар, аһылыктарын хасааһа баар. Барытын илэ харахпытынан көрдүбүт, бэлиэтээтибит. Бэйэлэрэ даҕаны сэрэх олороллор, биир даҕаны сүөһүнү, сылгыны ходуһаҕа хаалларбакка эрдэттэн үүртэлээн таһаартыыллар”, — диэн Петр Николаевич кэпсээтэ.
Өлүөнэ, Токко өрүстэргэ хараардыы үлэтин барытын бүтэрбиттэр. 258 527 солкуобай суумаҕа ыарыыттан харыстанар уонна дезинфекциялыыр сириэстибэлэри атыыласпыттар. Гидропостар бары бэлэмнэр.
Билигин уу кэлиэн сөптөөх нэһилиэктэргэ олорор биирдиилээн ыалы кэрийэн өйдөтөр сүбэлэри түҥэтэллэр, уу кэлэр түгэнигэр хайдах дьаһанар туһунан кэпсииллэр, сүөһүнү хаайар сир ханан баарын быһаараллар, илии баттаталлар диэн этэр.
Урукку сылларга ууга барбыт нэһилиэк олохтоохторо тугу, хайдах дьаһанары билэр буолан, син сэрэх сылдьаллар, бэлэм олороллор.
Людмила ПОПОВА, edersaas.ru