Социальнай ситимнэринэн уонна мессенджэринэн Өлүөхүмэ куорат Кресты диэн сиригэр муус дьиэҕэ тиийэ тахсыбыт хаартыскалара тарҕаннылар. Чахчытын истээри итиэннэ улууска өрүс барыытын туруга хайдаҕын туоһуластыбыт.
Улуус дьаһалтатын гражданскай оборонаҕа уонна ыксаллаах быһыыга кылаабынай исписэлииһэ Петр Торговкин:
— Бүгүн, ыам ыйын 10 күнүнээҕи туругунан, Олоохуна өрөттөн мууһу өрүс төрдүгэр киллэрэр, Өлүөхүмэ куорат, Солянка, Торицкай сэлиэнньэлэринэн Өлүөнэ өрүһү хамсата турар.
Билиҥҥи кэмҥэ Куду Күөл, Бэс Күөл, Тээнэ нэһилиэктэригэр муус сэдэхтик устуута бэлиэтэнэр. Тээнэҕэ эмиэ, өрөттөн номнуо уута киирэн, өрүс төрдүгэр таһаарда. Онон билигин, эппитим курдук, Өлүөнэ өрүһү хамсата турар. Өлүөнэ устуо өссө даҕаны эрдэ, Саха сирин кыраныыссатыгар киирэ илик.
Куораттан 13 килэмиэтирдээх сиргэ Крестыга даачалар бааллар. Олоохуна өрүс бастакы күүстээх халҕаһалыы анньан тахсыытыгар, биир даачаҕа муустар тоҕута анньыбыттар. Бу иннинээҕи чугастааҕы сылларга маннык түгэн бэлиэтэммэтэҕэ. Бэҕэһээ хамыыһыйа баран көрбүтэ. Крестыга олорор аҕыйах дьону хамыыһыйа тиийэ сылдьан сэрэппитэ, малларын-салларын үөһэ ууралларыгар сүбэлээбитэ.
Троицкай нэһилиэк аттынан уу таһыма үрдүк, онон баһылык нэһилиэнньэ ортотугар үлэни ыытар, бэлэм олороллор, — диэн иһитиннэрдэ.
Людмила ПОПОВА, “Саха сирэ” хаһыат, edersaas.ru
Хаартыска — бассааптан.