Сабаҕалааһын быһыытынан, Өлүөхүмэ сиригэр-уотугар өрүс мууһа быйыл ыам ыйын 8-13 күннэригэр көтөҕүллүөхтээх.
edersaas.ru
Тыа хаһаайыстыбатын управлениета сааскы халаан уутун хоромньута суох аһардар туһугар дьаһаллары эрдэттэн тэрийэр.
Ол курдук, нэһилиэктэр пааспардарын, ууга барар кутталлаах эбийиэктэр испииһэктэрин оҥорторор. Уу кэлэр кутталлаах кэмигэр сүөһүнү-сылгыны үөһэ, уу ылбат сиригэр таһааран быстах хаайар пууннары сөргүтэр, тустаах үөрэхтэри ыытар.
Муус харыыта таҕыстаҕына, сэттэ нэһилиэнньэлээх пуун ууга барар кутталлаахтар. Онон бу нэһилиэктэргэ халаан уутун хоромньута суох аһардар туһугар бэлэмнэнии үлэтэ кулун тутартан саҕаламмыта. Бу күннэргэ уу ааһар кэмигэр I Нөөрүктээйигэ 485 ынах сүөһүнү, 597 сылгыны, II Нөөрүктээйигэ 456 ынах сүөһүнү, 392 сылгыны, Троицкайга 132 ынах сүөһүнү, 83 сылгыны, Хороҕо 30 ынах сүөһүнү, 126 сылгыны, Кыыллаах Арыыга 608 ынах сүөһүнү, 553 сылгыны быстах хаайар эвакопууннар бэлэмнэннилэр. Аны сөп буолар от уонна бурдук саппааһа тиэрдиллиэҕэ диэн улуустааҕы суһал ыстаап иһитиннэрэр.
Раиса Сибирякова, «Саха сирэ» хаһыат, edersaas.ru