Ыйбыт иккис аҥаара төһө даҕаны тымныйдар, ыһыы үлэтэ харгыстаммата. Өлүөхүмэ улууһун Үҥкүрүгэр кииннэнэн үлэлиир «Поиск» тыа хаһаайыстыбатын кэпэрэтиибэ «Кладовая Олекмы» хааччахтаммыт эппиэтинэстээх тэрилтэни уонна Улахан-Муҥку, Бастакы Нөөрүктээйи нэһилиэктэригэр баар сибиинньэ пиэрмэлэрин бурдугунан хааччыйар.
Кэпэрэтиип ыһыытын ыам ыйын 17 күнүттэн саҕалаабыта. Билигин уопуттаах мэхэньисээтэр Антон Бояркин саҥа “ХТЗ” тыраахтарынан эбиэс ыһыллар бааһынатын сирин хоруттарар, атыттар үөһэ, Куранда бааһынатыгар, сэлиэһинэйи уонна ньэчимиэни ыһа сылдьаллар. Ыскылаат сэбиэдисэйэ Роман Гонт суоппар Борис Седалищевтыын ыскылааттан сиэмэни, уоҕурдууну бааһынаҕа сарсыарда эрдэттэн таһаннар, былааннаммыт үлэ харыыта суох барарын хааччыйаллар. Ону мэхэньисээтэрдэр Поликарп Федулов уонна Анатолий Шумилов «Беларусь» тыраахтардарынан ыһаллар. Кинилэргэ оробуочайдар Юрий Силантьев, Михаил Борисов, Антон Шараборин көмөлөһөллөр. Кэккэлэһэ бааһынаҕа Юрий Васильев “Т-150” тыраахтарынан сир таҥастыыр.
— Күн бүгүҥҥү туругунан, бурдугу 140 гектарга ыстыбыт, ол иһигэр ньэчимиэни 80, эбиэһи уонна сэлиэһинэйи отуттуу гектарга, — диир хаһаайыстыба салайааччыта Алексей Самсонов. — Улууска сүөһү-сылгы уонна сибиинньэ ахсаана эбиллэн иһэр, ол тэҥинэн бурдукка наадыйыы улаатар. Ити иһин сирбитин кэҥэтэн, 380 гектар оһорбо сири эбии түүлэһэн оҥоро сылдьабыт. Дьиҥинэн быраҕыллыбыт бааһынаны чөлүгэр түһэрэргэ икки сыл ирдэнэр эрээри, биһиги саҥа бааһыналарбытыгар эһиилгиттэн үлэлиэхпит. Судаарыстыба ыһыыга субсидия көрөр, Тыа хаһаайыстыбатын уонна ас-үөл бэлиитикэтин министиэристибэтэ итиэннэ улууспут ороскуот 70 % -ын толуйар буоланнар, үлэлииргэ интэриэс баар.
Валерий МАЛЫШЕВ, Өлүөхүмэ, www.edersaas.ru сайтка анаан.
Хаартыскаҕа ааптар түһэриитигэр: сир уустара.