Бу күннэргэ Өлүөхүмэ улууһун АПК-тын үлэһиттэрэ үгүс мунаарар боппуруостарыгар чопчу хардалары ыланнар, улаханнык сэргэхсийдилэр.
edersaas.ru
Ол курдук, «Туймаада Агроснаб» ААУо генеральнай дириэктэрэ Н.Н.Алексеевы кытары сирэй көрсөн олорон тыа хаһаайыстыбатын бородууксуйатын, чуолаан, хортуоппуй уонна оҕуруот аһын, соҕотуопкатын уонна батарыытын туһунан кэпсэттилэр. «Саха Өрөспүүбүлүкэтин тыатын хаһаайыстыбатын информационнай-консультативнай хааччыллыытын киинэ» (ЦИКОСХ) судаарыстыба бүддьүөтүн тэрилтэтин салайааччы С.Н.Плотников кыттыылаах «Тыа хаһаайыстыбатын табаарын оҥорооччуларга көрүллэр судаарыстыба өйөбүлүн уопсай усулуобуйатын туһунан» сэминээргэ сырыттылар.
«Туймаада Агроснаб» салалтатын кытары тэриллибит сүбэ мунньаҕы улуус баһылыгын бастакы солбуйааччы Н.В. Кузнецов салайан ыытта. Бэбиэскэҕэ биир сүрүн боппуруос турда: быйыл хортуоппуйу кимиэхэ уонна төһө сыанаҕа туттарабытый? Сүрүн иһитиннэриини оҥорбут тыа хаһаайыстыбатын улуустааҕы управлениетын начальнига Ф.В.Чердонов этэринэн, Өлүөхүмэ хаһаайыстыбалара кэтэх ыаллары киллэрбэккэ туран, сыллата 1000 туонна хортуоппуйу хомуйар кыахтаахтар. Бородууксуйаны батарыыга үс хайысха баар: улуус иһинээҕи ырыынак, Дьокуускай куорат уонна өрөспүүбүлүкэ соҕуруулуу-арҕааҥҥы улуустара. Онуоха сүрүн ыйытыы туттарыллар сыанаҕа туһаайыллар. Хаһаайыстыбалар хортуоппуйу улуустааҕы «Өлүөхүмэ Агропродукт» кэпэрэтиипкэ, «Өлүөхүмэ кыладабыайа» ХЭУо-ҕа уонна өрөспүүбүлүкэ киин куоратын итиэннэ хотугу улуустары хааччыйар «Туймаада Агроснаб» хампаанньаҕа туттараллар.
«Туймаада Агроснаб» ААУо генеральнай дириэктэрэ Н.Н.Алексеев уу суолунан хотугу улуустарга илдьэргэ анаан, балаҕан ыйын 5 күнүн аһарбакка 1100 туонна хортуоппуйу киилэтин 18-тыы солкуобайга тутарга бэлэмин эттэ. Онуоха хортуоппуйу тиэйии-таһыы, харайыы, батарыы былаанын эрдэттэн оҥорорго кими, ханнык хаһаайыстыбаны кытары дуогабар түһэрсэрбитин чопчу билиэхтээхпит, оччотугар эрэ уу аалын болдьохтоох кэмҥэ хааччыйар ситиһиллэр диэтэ. Онон хаһаайыстыбалар ыам ыйа бүтүөр диэри үчүгэйдик быһаарынан баран, дуогабар түһэрсэллэригэр ыҥырда. Хортуоппуйу таһынан, 50 туонна моркуобу, 50 туонна сүбүөкүлэни, 200 туонна хаппыыстаны тутуохпутун сөп диэтэ.
ЦИКОСХ судаарыстыба бүддьүөтүн тэрилтэтин салайааччы С.Н.Плотников баһылыктаах тыа хаһаайыстыбатын министиэристибэтин оробуочай бөлөҕө Өлүөхүмэ улууһугар олунньу 25 күнүттэн үлэлээбитэ. Токко, Даппарай, бастакы уонна иккис Нөөрүктээйи, Абаҕа нэһилиэктэригэр сылдьан, уон биир бааһынай хаһаайыстыба баһылыгар биисинэс-бырайыактары оҥорорго көмөлөстө.
Улуус киинигэр тэриллибит сэминээргэ бааһынай хаһаайыстыбалар баһылыктара, нэһилиэктэр дьаһалталарын тыа хаһаайыстыбатыгар исписэлиистэрэ сырыттылар. Семен Николаевич сыыппаранан чахчыларга тирэҕирэн, өрөспүүбүлүкэ тыатын хаһаайыстыбатын сайдыытыгар Өлүөхүмэ улууһа ылар оруолун туһунан кэпсээтэ, тыа хаһаайыстыбатын табаарын оҥорооччуларга көрүллэр судаарыстыба өйөбүлүн уопсай усулуобуйатын, ханнык бырагыраманан туох грант баарын быһаарда. Ыйытыыларга хоруйдаата. Онон, олохтоохтор интэриэһиргиир боппуруостарыгар толору хоруйдары ылан астыннылар. Салгыы министиэристибэ исписэлиистэрэ тыа хаһаайыстыбатын улуустааҕы управлениетын үлэһиттэрин кытары Саха сирин арҕааҥҥы түбэтигэр АПК-ны сайыннарыы кэнсиэпсийэтин ырытыыга үлэлээтилэр.
Өлүөхүмэттэн Валерий Малышев, «Саха сирэ» хаһыат, edersaas.ru