Өлүөхүмэҕэ ыһыы үлэтэ бастакы булуук суолун бырааһынньыгынан саҕаланна
«Кладовая Олекмы» ХЭУо сааскы ыһыы үлэтин Бастакы булуук бырааһынньыгынан саҕалыыр үтүө үгэстээх.
edersaas.ru
Ыам ыйын 23 күнүгэр Өлүөхүмэ Амматынааҕы отделение бааһынатын кытыытынан сарсыарда эрдэттэн булууктаах көлөлөр (биэс “Беларусь” уонна үс “Т-150” тыраахтардар) кэккэлэстилэр. Даҕатан эттэххэ, быйыл хаһаайыстыба биэс саҥа тиэхиньикэни, ол иһигэр биир хамбаайыны ылыахтаах. Тиэхиньикэ элбиирэ үчүгэй, ол аата бааһына иэнэ кэҥэтиллэр буолбут диэн сир уустара үөрэллэр. Кинилэр бу бааһынаҕа сүөһү аһылыгын: эбиэһи, ньэчимиэни уонна Судан отун ыһар былааннаахтар.
Сааскы ыһыы кэмэ саҕаламмытынан, хаһаайыстыба үлэһиттэрин тыа хаһаайыстыбатын улуустааҕы управлениетын начальнига Федор Чердонов эҕэрдэлээтэ итиэннэ бастыҥ мэхэньисээтэрдэргэ Николай Ханхалаевка уонна Сергей Габышевка Махтал суруктары туттарда. Нэһилиэк дьаһалтатын баһылыга Лидия Семенова итиэннэ бочуоттаах ыалдьыт Андрей Копылов сир уустарыгар ситиһиилээх үлэни, өлгөм үүнүүнү баҕаран тыл эттилэр. Олохтоох култуура дьиэтин иһинэн үлэлиир «Рябинушка» уонна «Селяне» ырыа ансаамбылларын кыттыылаахтара үлэ дьонун истиҥ ырыаларынан эҕэрдэлээтилэр.
Долгутуулаах кэм үүннэ – хаһаайыстыба генеральнай дириэктэрэ Николай Ефимов-Владимиров хамаанда биэрээтин кытары «Мы с железным конем все поля обойдем…» маршынан доҕуһуоллатан, мэхэньисээтэрдэр тыраахтардарын бааһына диэки салайан, сири тэлиини саҕалаабытынан бараллар.
Бэйэ инф, «Саха сирэ» хаһыат, edersaas.ru