Өлүөхүмэ оройуонун ытык кырдьаҕаһа Олимпиада Семеновна Евстигнеева 100 сааһынан итиитик-истиҥник эҕэрдэлээтилэр.
Өлүөхүмэ оройуонун олохтооҕо Олимпиада Семеновна Евстигнеева 100 сааһын туолбутунан, ытык кырдьаҕаска «Үйэ Саас» бочуоттаах бэлиэ, Арассыыйа Бэрэсидьиэниттэн, СӨ Ил Дарханыттан уонна СӨ Үлэ, социальнай сайдыы министиэристибэтиттэн эҕэрдэ суруктар, бэлэхтэр туттарылыннылар.
Олимпиада Семеновна 1921 сыллаахха тохсунньу 15 күнүгэр күн сирин көрбүтэ. Марха орто оскуолатын алын сүһүөх кылааһын үөрэнэн бүтэриэҕиттэн, бэһис кылаастан, төрөппүттэригэр көмөлөспүтэ. 1937 сылтан Ленин аатынан колхуоска үлэлээбитэ. Уоттаах сэрии сылларыгар звеновод-биригэдьииринэн бэриниилээхтик, туох баар сыратын ууран үлэлээбитин сыаналааннар, оччолорго былаатынан наҕараадаламмыта. Хатыҥ сэлиэнньэтиттэн Мархачааҥҥа диэри атынан буостаны таспыта. Күндү киһи 1957 сыллаахтан бочуоттаах сынньалаҥҥа тахсан олорор.
Санатан эттэххэ, «Үйэ саас» бочуоттаах бэлиэ СӨ Ил Дарханын ыйааҕынан чөл, чэгиэн олоҕу өйүүр, тарҕатар соруктаах, өрөспүүбүлүкэҕэ уһун үйэлээхтэргэ махтал уонна ытыктабыл бэлиэтигэр олохтоммута. Бочуоттаах бэлиэнэн Саха сиригэр олохтоох 100 саастарын туолбут ытык кырдьаҕастар наҕараадаланаллар. Бочуоттаах бэлиэ дастабырыанньалаах уонна 100 тыһыынча солк.суума харчынан бириэмийэлээх туттарыллар.
+1
+1
+1
+1
+1
+1
+1