Бырабыыталыстыба отчуота бүгүн Өлүөхүмэ улууһугар ыытылла турар. Олохтоохтор сүрүннээн суол-иис, сибээс, почта боппуруостарын, оскуола тутуутун туруорсаллар. Ону таһынан медицина үлэһиттэрэ тиийбэттэрин этэллэр. Урицкай, Дабаан нэһилиэктэрэ фельдшер көрдүүллэр.
Доруобуйа харыстабылын министиэристибэтэ иһитиннэрбитинэн, Өлүөхүмэ улууһугар биир сыл иһигэр сүүрбэ биир доруобуйа харыстабылын үлэһитэ тиийбит. Билигин медицина үлэһитин кыһалҕата Урицкай, Дабаан нэһилиэктэригэр турар.
Түргэн-тарҕан интернет ситимин үгүс нэһилиэк туруорсар. Инновация, цифровой сайдыы уонна инфокоммуникационнай технология министиэристибэтэ иһитиннэрбитинэн, быйыл Өлүөхүмэҕэ Марханан, Хоронон, Солянка бөһүөлэктэринэн оптоволокно барыахтаах. Иллэрээ сыл “Ростелеком” хампаанньаны кытары дуогабар түһэрсиллэн турар. Суотабай сибээс билигин бары нэһилиэктэргэ кэлэн турар. Суола-ииһэ суох, ыраах сытар сирдэргэ спутник нөҥүө интернет киирэр.
Өлүөхүмэ улууһугар бүгүн СӨ бырабыыталыстыбатын бэрэссэдээтэлин бастакы солбуйааччы Дмитрий Садовников салайааччылаах бөлөх өрөспүүбүлүкэ үлэтин-хамнаһын нэһилиэнньэҕэ отчуоттаата. Мунньах быһа сибээһинэн барда.
Аграфена КУЗЬМИНА