Өлүөхүмэ урбаанньыттара олорор куораттарын ыраастык тутар иһин бары кыһамньыларын уураллар.
«Ыраас куорат иһин» бөлөх кыттыылаахтара дьон-сэргэ сылдьар уопсай сиригэр-уотугар, куорат пааркатыгар субуотунньуктары оҥороллор. Бу хамсааһыны тэрийээччилэр ортолоругар урбаанньыт Денис Сайфутдинов баар диэн sakha.gov.ru суруйар. Кини куорат ыраас буоларын туһугар бары кыһамньытын уурар Алла Боянованы кытары хамсааһыҥҥа күүскэ ылсыбыт. Ол туһунан СӨ Урбаан министиэристибэтэ иһитиннэрбит.
«Куораты ыраастык тутар туһугар хас эмэ сыллаах сыралаһыы кэнниттэн, уулуссаны, болуоссаттары өрө тардыыны букатын атыннык уонна тиһиктээхтик тэрийэн ыытарга быһаарыммыппыт. Куорат дьаһалтатыгар этиилээх тиийбиппин өйөөбүттэрэ. Онон кыһынын уонна сайынын Өлүөхүмэ сирин-уотун көрөргө-истэргэ хантараак түһэрсиллибитэ. Ол түмүгэр, биһиги Кыайыы болуоссатыттан саҕалаан Дьоруойдар Аллеяларыгар тиийэ хомуйарга, бэрээдэктииргэ, өрө тардарга эппиэтинэстээхпит. Минньиктиибит, ыраастыыбыт, ыскамыайкалары өрөмүөннүүбүт, сылгы, сүөһү мээнэ киирбэтин диэн ааннары туруортуубут. Өссө куорат дьаһалтатын сайаапкатынан, дьон-сэргэ сылдьарыгар табыгастаах буоларын курдук тротуардары өрөмүөннүүбүт, ытырыык, ол-бу араас оту охсобут. Биир тылынан, дьоҥҥо-сэргэҕэ үчүгэй усулуобуйаны олохтуурга, куораппыт ыраас буоларыгар кыһаллабыт», — диэбит Денис Сайфутдинов.
+1
+1
+1
+1
+1
+1
+1