Саха сирин Бырабыыталыстыбатын бэрэссэдээтэлин бастакы солбуйааччы Кирилл Бычков Өлүөхүмэ улууһугар оробуочай сырыытын кэмигэр “Демография” уонна “Олорор дьиэ уонна куорат эйгэтэ” национальнай бырайыактарынан тутуллар эбийиэктэри тутуу хаамыытын көрдө.
edersaas.ru
Быйыл улууска кырдьаҕастары уонна доруобуйаларынан хааччахтаах дьону социальнай өттүнэн хааччыйар 200 миэстэлээх куорпуһу тутууну бүтэрии былааннанар. “7 тыһ кв. миэтэрэттэн ордук иэннээх дьиэ “Демография” национальнай бырайыак чэрчитинэн уонна РФ Үпкэ министиэристибэтин үбүн суотугар тутуллар. Арассыыйа Бэрэсидьиэнэ Владимир Путин сорудаҕынан олоххо киллэриллэр национальнай бырайыактар көмөлөрүнэн бөдөҥ социальнай эбийиэктэр тутуллаллара кэрэхсэбиллээх”, — диэтэ Кирилл Бычков.
Кини ону сэргэ “Олорор дьиэ уонна куорат эйгэтэ” национальнай бырайыак саахалланар кутталлаах дьиэлэртэн көһүү бырагырааматынан дьэндэйиэхтээх элбэх кыбартыыралаах дьиэлэри тутуу хаамыытын билистэ.
Кирилл Бычков: “Тутууну ыытарга кыраапык тутуһулларын көрдүбүт. Тутуу хаачыстыбата үрдүк таһымнаах”, — диэн уопсайынан Саха сиригэр 1 мөлүйүөн 150 тыһ. кв.миэтэрэттэн тахса иэннээх саахалланар туруктаах дьиэлэри көтүрэр былааннаахтарын санатта. “Нордстрой” ХЭО генеральнай дириэктэрэ Хачатур Аракелян иһитиннэрбитинэн, дьиэ быйылгы сыл бүтүүтэ үлэҕэ киирэрэ былааннанар. Онтон Гагарин уулуссатын 81-гэр тутулла турар 100 кыбартыыралаах дьиэни тутуу эмиэ кыраапык быһыытынан тутуллан иһэрин туһунан “Өлүөхүмэ суоллара” ХЭО бэрэстэбиитэлэ Олег Шингерей иһитиннэрдэ.
Манна даҕатан эттэххэ, үгүс муниципальнай тэриллиилэр дьиэлэри көтүрүү үлэтигэр үбү көрбөттөр. Дьиэни көтүрүү федеральнай үпкэ көрүллүбэт. Оттон өлүөхүмэлэр бу боппуруоһу бэйэлэрэ быһааралларын Кирилл Бычков тоһоҕолоон бэлиэтээтэ.
Надежда ЕГОРОВА, «Саха сирэ», edersaas.ru