Бэс ыйын 25 күнүттэн Төрүт сокуоҥҥа уларытыылары киллэриигэ Бүтүн Арассыыйатааҕы куоластааһын саҕаламмыта. Дьон дьиэ кэргэнинэн тиийэн куоластаан, бэйэтин санаатын биллэрэр. Өлүөхүмэ улууһа тэрээһиҥҥэ көхтөөтүк кыттар.
Өлүөхүмэ улууһугар Төрүт Сокуоҥҥа уларытыылары киллэриигэ куоластааһын бэс ыйын 23 күнүттэн саҕаламмыт. Биллэн турар, ыраах, уустук айаннаах сирдэри хаппыттар. Улууска, уопсайа, 40 быыбардыыр хамыыһыйа баар. Итиниэхэ быстах кэмнээх дьон олорор, үлэлиир сиригэр 4 хамыыһыйаны тэрийбиттэр. Улууска бүгүҥҥү күн туругунан барыта 3065 киһи куоластаабыт.
Улуустааҕы куоластыыр хамыыһыйа бэрэссэдээтэлэ Алла Боянова: “Сиринэн уонна салгынынан тырааныспарынан сылдьан болдьоҕун иннинэ куоластааһыҥҥа ньиэби хачайдыыр ыстаансыйалар үлэһиттэрэ, табаһыттар, сылгыһыттар бастакынан хабыллыбыттара. Бүгүн “Өлүөхүмэ” айылҕа судаарыстыбаннай заповеднигын үлэһиттэрэ куоластыахтаахтар.
Уопсайынан, коронавирус кэмэ буолан, дьон сэрэхэдийэр. Биллэн турар, тэйиччи туруу, мааска, бэрчээкки, көстүүм, дезинфекциялыыр сириэстибэ барыта тутуһуллар. Этэргэ дылы, “кааска-мааска” барыта баар. Улууска, бүгүҥҥү күн туругунан, ордук көхтөөхтүк II-Нөөрүктээйи нэһилиэгэ куоластаата”, — диэн кэпсиир.
Людмила ПОПОВА, “Саха сирэ” хаһыат, edersaas.ru
Хаартыска: «Өлүөхүмэ» хаһыаттан.