Бэҕэһээ киэһэ Өлүөхүмэ куорат бириистэнигэр бырааһынньык тыына билиннэ, элбэх киһи муһунна. “Гармония” КК уонна нэһилиэктэр Олоҥхо ыһыаҕын ыалдьыттарын, кыттааччыларын көрүстүлэр. Утуу-субуу “Валдай”, “Метеор” уонна “Восход” түргэн суудуналар кэлэн тигистилэр.
Еремей Решетников баһылыктаах Улахан Муҥку бэрэстэбиитэллэрэ Таатта улууһун дэлэгээссийэтин, элбэх киһилээх, араас саастаах олоҥхоһуттар, хомусчуттар фольклорга бөлөхтөрүн дэлэгээссийэтин, Аан дойдутааҕы хомус түмэлин, киинин дириэктэрэ Дмитрий Бястинов салайааччылаах куонкурус дьүүллүүр сүбэтин Өлүөхүмэ улууһун култууратын управлениетын салайааччылара Анна Кубряк, Мария Ларионова, “Гармония” КК дириэктэрин солбуйааччы Саргылаана Свешникова көрүстүлэр. Дьокуускайтан кэлбиттэр ортолоругар биллиилээх ырыаһыт Лэгэнтэй баар. Ыалдьыттары араас омук тоҕуоруһан олорор Өлүөхүмэ дьоно ырыалаах, үҥкүүлээх, национальнай аһылыктаах көрсүбүттэриттэн үөрбүттэрэ көстөр.
Бүгүҥҥүттэн Олоҥхо ыһыаҕын сценарийынан Аанньаах Хочотугар улахан тэрээһиннэр уонна куонкурустар саҕаламмытынан барыахтара.
Валерий МАЛЫШЕВ, “Өлүөхүмэ” хаһыат.
Ааптар хаартыскаҕа түһэриитэ.