Өлүөхүмэ улууһугар «Өлүөхүмэ» аэропорт көтөр-түһэр балаһатыгар бетон билиитэлэри ууруу үлэтэ салҕанан бара турар.
edersaas.ru
“Билигин 1580 билиитэ ууруллубут, бырайыак быһыытынан, перрон уонна салайар суол кэтитин учуоттаан балаһаҕа барыта 7,5 тыһыынча билиитэ ууруллуохтаах. Итинтэн быйыл 5 тыһыынчата аҕалыллыахтааҕа былааннанар”, — диэн улуус дьаһалтата иһитиннэрэр.
Көтөр балаһаҕа икки биригээдэ үлэлиир. Манна миэстэтигэр сиэмэннээх кумаҕы бэлэмниир икки кыракый «миксердар» үлэлииллэр. 2х6 квадратнай миэтэрэ кээмэйдээх уонна 4,2 туонна ыйааһыннаах билиитэни сиэмэннээх “сыттыкка” уураллар. Билиитэлэр икки ардыларыгар быыһа 7 мм тахсыбат гына ыпсарыллыахтаах, бу үлэ ордук уустук өрүтэ.
2020 сылга былаан быһыытынан 525 миэтэрэ уһуннаах учаастак тутуллуохтаах. Көтөр балаһа уопсай уһуна 1772 м, кэтитэ 36 м буолар, оттон сөмөлүөт эргийэр миэстэтигэр уонна балаһата бүтүүтүгэр 46-лыы миэтэрэ кэтириир. Ону таһынан аварийнай-быыһыыр станцияны уонна уматык ыскылаатын тутарга оннуларын кутуу үлэтэ бара турар.
Егор Карпов, «Саха сирэ» хаһыат, edersaas.ru