Өлүөхүмэ хайысхатынан тибиигэ хаайтарбыт массыыналарга көмөлөһө тиэхиньикэлэри ыытыахтара
Бу күннэргэ Өлүөхүмэ улууһун олохтоохторо төлөпүөннэрин маныыртан соло булбаттар, оҕолорун-урууларын кэтэһэллэр, бырааһынньыктыыр астарын-үөллэрин күүтэллэр. Өрүскэ күүстээх тыал түһэн, массыыналар тибиигэ батыллан тураллар үһү диэн сурах кэллэ. Улуус дьаһалтатыгар бүгүн суһал мунньах буолбут.
edersaas.ru
Хаҥалас уонна Өлүөхүмэ улуустарын икки ардыгар хаайтаран турар массыыналар боппуруостарынан улуус дьаһалтатыгар бүгүн суһал мунньах буолбут. Массыыналар тибиигэ хаайтаран тураллар диэн сурах иһиллэр. Нэһилиэктэр икки ардыларыгар сибээс суох. “Суһал мунньах түмүгүнэн, Өлүөхүмэ улууһун ыксаллаах быһыыга-майгыга хамыыһыйата тарированнай уматыктаах тиэхиньикэлэри уонна сылаас кунг массыынаны ыытарга быһаарда”, – диэн улуус дьаһалтатын пресс-сулууспата иһитиннэрэр. Итиэннэ кыһыҥҥы айан суол аһыллыан иннинэ айанныыртан туттуналларыгар ыҥыраллар.
Сөмөлүөт сыаната ыарахан, ол иһин дьон кыһалҕаттан сиринэн сылдьарга күһэллэр. Олохтоохтор иһитиннэрэллэринэн, билэр дьонноро-сэргэлэрэ, Саҥа дьыллыыр аһылыктара, сакаастара хаайтарбыт. Онон нэһилиэнньэ Дьокуускай-Өлүөхүмэ хайысхатынан айан суолун туруорсара оруннаах.
Людмила ПОПОВА, “Саха сирэ” хаһыат, edersaas.ru
Хаартыска: Өлүөхүмэ улууһун дьаһалтата, СИА.