Өлүөхүмэҕэ Олоҥхо ыһыаҕын кэмпириэнсийэтэ ыытылынна...
Олох-дьаһах

Өлүөхүмэҕэ Олоҥхо ыһыаҕын кэмпириэнсийэтэ ыытылынна

Сунтаар улууһуттан Кэмпэндээйи — Өлүөхүмэ былыргы суолун тэлэн  култуура сэттэ  уонна   үөрэҕирии эйгэтиттэн биир  үлэһит буолан, 12 чаас устата айаннаан Олоҥхо ыһыаҕын кэмпириэнсийэтигэр кытынныбыт.

edersaas.ru

Икки күн устата тэриллэр кэмпириэнсийэҕэ сунтаардар иһитиннэрии, маастар-кылаас оҥордубут уонна айар кэнсиэркэ кытынныбыт. Ол курдук, Кутанаттан Мария Афанасьева тойукка уһуйуу маастар-кылааһын, Олоҥхо дьиэтиттэн Мария Боякова «Тоҕус мэҥэ хамнаныы», Туяра Алексеева «Олоҥхонон олоҥхолоох айан», кииннэммит библиотекаттан Изабелла Жиркова «Библиотекалар краеведениеҕа үлэлэрэ» дакылааттары иһитиннэрдилэр, «Бартыһаан» КК Айсен Федоров маастар-кылаас, Оҕо искусствотын оскуолатыттан Алексей Степанов режиссерскай үлэ өттүнэн санаа атастаста. Онтон култуура салайааччыта биэс боппуруоска туһаайан туруорсуу оҥордум, ол курдук:

1. Бэс ыйын 20-21 күннэригэр ыһыахтар улуустарынан тэриллиэхтээхтэр, ол кэннэ  олоҥхо ыһыаҕа бар дьону түмэр түмүктүүр ытык күн буолуохтаах диэн култуура 17 салайааччыларын  илии баттааһыннаах суругу туттардым.

2. С.А.Зверев — Кыыл Уолун аатынан государственнай бириэмийэ олохтуохха, норуот уус-уран айымньытын, оҥоһуктарын кылааннарын бу бириэмийэнэн көҕүлүөххэ, уруйдуохха.

3. Сибиэрэп — Кыыл Уолун «Оһуор үҥкүүтүгэр» олоҕурбут «Тоҕус мэҥэ хамнаныыны» Олоҥхо ыһыахтарыгар туһаныахха.

4. Олоҥхо ыһыахтара сыл аайы улуустарынан тэриллэр буоллаҕына оһуохайы Сунтаарга тэрийиэххэ.

5. Ыһыах саха төрүт аһын сөргүтүүгэ, сайыннарыыга болҕомто туһаайан атын омук аһын, доруобуйаҕа кутталлаах астары тохтотуохха (фастфуд, кока-кола), ону кытта ыһыах кэмигэр оҕолорго төрүт өбүгэ оонньуутун көҕүлээн эрэһиинэ батуттары бу күн тохтотуохха, хаартыскаҕа хатааччылар, видеоҕа уһулааччылар сиэр-туом кэмигэр алгысчыт иннигэр-кэннигэр түспэккэ, аартыгы кэспэккэ сылдьалларыгар үлэ ыытыахха. Ыһыах кэмигэр ыттар — ытык күҥҥэ суох буолуохтаахтарыгар эмиэ анал хамыыһыйа үлэлэтиэххэ диэн этиилэри оҥордум. Сатаннаҕына биһиги ыһыахпытын кытта күнэ ханыыласпатаҕына, сунтаардар элбэх буолан Өлүөхүмэ ытык сиригэр ыалдьыттыахпыт!

Кэмпириэнсийэ киэһэ өттүгэр фольклорнай кэнсиэр тэрилиннэ, манна Айсеммыт Сибиэрэп «Сарсын-сарсын сарсыардатын» иһитиннэрэн дьон сүргэтин көтөхтө, Туйаарабыт хомуһу, тойугу, ырыаны холбуу тутан толорон дьон астыммыт дохсун ытыс тыаһынан арыалланна уонна Мария Павловна нарын куолаһынан норуот ырыаларын  ыллаан   бэртээхэй айар киэһэ буолла. Махтал тэрийээччилэргэ, эҕэрдэ Өлүөхүмэлэргэ!

Мария Кобельянова-Тускулаана, edersaas.ru

0
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

3 × 4 =