От ыйын 15 – 16 күннэригэр Өлүөхүмэ улууһугар Ыччат күннэрэ буолла. Саха Өрөспүүбүлүкэтигэр Ыччат сылыгар анаммыт тэрээһини тэрийсиигэ ыччат дьыалатыгар, дьиэ кэргэн бэлиитикэтигэр миниистири солбуйааччы Василина Лукина салайааччылаах дэлэгээссийэ уонна ыччат уопсастыбаннай холбоһуктарын бэрэстэбиитэллэрэ кыттыыны ыллылар.
Тэрээһин чэрчитинэн “Олекматур” экотуристическай пуорум былаһааккатыгар Ыччат сылыгар анаммыт дьаһаллар тула “төгүрүк остуол” ыытылынна, семинардардар, лиэксийэлэр буоллулар. Пуорум кыттыылаахтара эдэр дьон хандьыдаат быһыытынан муниципальнай быыбардарга кыттыыларын туһунан дебакка санааларын үллэһиннилэр.
“Төгүрүк остуолга” Өлүөхүмэ куоратын, Токко, Улахан Муҥку сэлиэнньэлэр бэрэстэбиитэллэрэ Ыччат сылыгар туох саҥа үлэни ыыппыттарын кэпсээтилэр. Бэлиэтээн эттэххэ, быйыл улуус сэлиэнньэлэригэр ыччаты кытта үлэҕэ үс штат эбии көрүллүбүт.
Пуорумҥа «Молодая Гвардия» уонна «Девушки-лидеры» ыччат уопсастыбаннай тэрилтэлэрин олохтоох салааларын салайааччыларын таллылар.
“Быйыл Ыччат күннэрин өссө хас да улууска тэрийэр былааннаахпыт, ол иһигэр Өлөөҥҥө, Абыйга, Аллараа Халымаҕа. Маннык тэрээһиннэргэ тыа сирин эдэр дьоно уонна ыччат өрөпүүбүлүкэтээҕи уопсастыбаннай холбоһуктарын лидердэрэ сирэй көрсөн үлэ уопутун үллэстэллэрэ улахан суолталаах”, — диэтэ Василина Лукина.
Роман Попов, “Саха сирэ” хаһыат, edersaas.ru