«Валдай 45Р» саҥа суудуналар бастакы рейстэрэ тиийиилэрин өлүөхүмэлэр улаханнык үөрэн-көтөн көрүстүлэр диэн ulus.media иһитиннэрэр.
Улуус фольлорга бөлөхтөрө капитаннары уонна экипаж чилиэннэрин алаадьынан, төгүрүк килиэбинэн, туустаах килиэбинэн күндүлүү, ырыанан арыаллыы көрүстүлэр.
Устар ааллар биир хапытааннара Чапаевоттан төрүттээх дойдулаахтара Михаил Кудрявцев тиийэн, олохтоохтор үөрүүлэрэ өссө улаатта.
«Суудуналар олус тупсаҕайдар, ыытарга чэпчэкилэр, капитаннар палубаҕа хосторугар элбэх электроника, прибор баар. Биһиги уонна, кылаабынайа, айанньыттарбыт саҥа суудунанан устары олус сөбүлээтилэр. Аны мантан инньэ төрөөбүт дьиэбэр хас күн аайы кэлэр кыахтанным. Чапаевоҕа төрөөбүтүм, Дьокуускайга олорбутум ыраатта. Өрүс флотугар үлэлиибин. Бу иннинэ «Метеорунан» сылдьар этим«, — диэн капитан үөрүүтүн үллэстэр.
Устар саҥа аал табыгастаах үчүгэй олбохтордоох, сылааһы биэрэр, сөрүүкэтэр систиэмэлээх, тэлэбиисэрдэрдээх, 45 миэстэлээх. Маны сэргэ, доруобуйаларынан хааччахтаах дьон айанныылларыгар табыгастаах гына оҥоһуллубут.
Бэлиэтииллэринэн, билиэт сыаната 7 050 солкуобай. Устар ааллар Өлүөхүмэҕэ аэропуорт өрөмүөннэнэр кэмигэр олохтоохтору таһарын туһунан эрдэ иһитиннэрэн тураллар. Бэлиэтэнэринэн, аэропуорт өрөмүөнэ алтынньы бүтүүтүгэр түмүктэниэхтээх.
+1
+1
+1
+1
+1
+1
+1