Былырыын Арктикатааҕы судаарыстыбаннай агротехнологическэй университет Өлүөхүмэ оройуонугар мас олордор питомнигы арыйбыта. Бу бырайыагынан кинилэр айылҕа харыстабылын Арассыыйатааҕы куонкуруһугар кыттан кыайбыттара.
Санатан эттэххэ, 2019 сыллаахха Ойуур кодексыгар уларытыылар киирэннэр, аны билигин тыаны кэрдибит киһи хайаатар да ол сиригэр мас олордуохтаах.
Мас үүннэриитинэн анаан дьарыктанар питомник Өлүөхүмэ оройуонугар Солянка сэлиэнньэтин таһыгар баар. Бырайыагынан университет ойуур комплексын факультетын үлэһиттэрэ уонна устудьуоннара дьарыктаналлар. Кинилэр 4,2 гектардаах сиргэ мас үүннэрэн саҕалаабыттара. Былаан быһыытынан, аһаҕас сиртэн 3 мөлүйүөҥҥэ, оттон сабыылаах сиртэн 140 тыһыынчаҕа диэри арассааданы ылыахтаахтар.
Ойуур комплексын факультетын декана Мария Слепцова бэлиэтииринэн, билигин үксүн тиит маһы үүннэрэллэр эбит. “Арассыыйаҕа билигин тиит араас көрүҥүттэн сүрүннээн Сибиир диэни олордоллор. Ити биһиги айылҕабытыгар улаханнык сөп түбэспэт, арай өрөспүүбүлүкэ соҕуруу өттүгэр кыралаан баар. Оттон биһиги питомникпытыгар үүннэрэр маспыт даурскай тиит мас диэн. Бу мас Саха сирин тыйыс усулуобуйатыгар хайа баҕарар эппиэттиир”, – диэн бэлиэтиир кини.
Бырайыак чэрчитинэн, питомнигы өссө кэҥэтэр былааннаахтар. Санатан эттэххэ, бу маннык бырайыак Саха сиригэр бастакытын ыытыллар. Үлэ түмүгэ икки-үс сылынан биирдэ биллиэҕэ.
Аграфена КУЗЬМИНА, “Саха сирэ” хаһыат.