Өлүөхүмэ улууһугар “Үтүө санаа харыйата” аахсыйа саҕаланна. Аахсыйаны көҕүлээччилэринэн көхтөөх ыччат Дарья Ларина (“Венеция” кафе), Виталий Сорошев (Улахан Муҥку сэлиэнньэтин “Аартык” айар дьиэ уус-уран салайааччыта) буолаллар.
“Венеция” кафеҕа бэлэх тиэрдиэххэ сөптөөх оҕолор ааттара, саастара ыйыллыбыт аккырыыккалардаах харыйа турар. Ким баҕарар онтон аккырыыкка ылан, бэйэтин баҕатынан оҕоҕо Саҥа дьыллааҕы соһуччу бэлэҕи оҥоруон сөп. Аахсыйаны бастакынан улуус баһылыга Николай Харбин, улуустааҕы дьокутааттар сэбиэттэрин бэрэссэдээтэлэ Андрей Солдатов, баһылыгы бастакы солбуйааччы Николай Кузнецов, социальнай боппуруостарга солбуйааччы Оксана Саввинова, Социальнай харалта управлениетын салайааччыта Анна Мамонтова, улуустааҕы үөрэх үлэһиттэрин идэлээх сойуустарын кэмитиэтин бэрэссэдээтэлэ Николай Котенко өйөөтүлэр. Бэлэхтэри кыаммат, уустук балаһыанньаҕа түбэспит дьиэ кэргэн оҕолоругар биэрэллэр. Биир сиргэ мунньан баран, Тымныы Оҕонньор уонна кини сиэнэ оҕолорго бэйэлэригэр илдьэн туттарыахтара.
Хас биирдии нэһилиэк аахсыйаҕа кыттыһан, бэйэлэрин сэлиэнньэлэригэр эмиэ ханыылыы тэрээһиннэри тэрийэллэр.
Улуус пресс-сулууспата.