Өлүөхүмэҕэ саҥа оҕо саада үлэҕэ киирдэ

Бөлөххө киир:

«Демография» национальнай бырайыак чэрчитинэн, социальнай хабааннаах элбэх эбийиэк тутуллар.  Бэҕэһээ, тохсунньу 18 күнүгэр,  Өлүөхүмэ оройуонугар кэрэ-бэлиэ тэрээһин буолла.  240 миэстэлээх саҥа оҕо саада  үлэҕэ киирдэ.  Саҥа уһуйаан Саха АССР тэриллибитэ 100 сылыгар аналлаах социальнай хабааннаах эбийиэктэр бырагырааматын иитинэн тутулунна.

«РФ Бэрэсидьиэнэ Владимир Путин быһаарыытынан  3-гэр диэри саастаах оҕолор оскуола иннинээҕи үөрэҕинэн хааччыллыылара инники күөҥҥэ турар. «Демография» национальнай бырайыак көмөтүнэн өрөспүүбүлүкэбит куораттарыгар, нэһилиэктэригэр  дьааһыла бөлөхтөөх оҕо саадтара күүскэ тутуллаллар.  3-гэр диэри саастаах оҕолор ийэлэрэ үлэҕэ тахсалларыгар сөптөөх усулуобуйа тэриллэр», – диэн Ил Дархан Айсен Николаев эрдэ санаатын үллэстибитэ.

Саҥа оҕо саада  хаарбах дьиэттэн көһөрүллүбүт олохтоохторго анаан тэрийиллибит микро-оройуоҥҥа тутуллубут.  Үс мэндиэмэннээх, 2 921,8 кв. м иэннээх саҥа таас дьиэ 12 бөлөхтөөх уонна дьааһыла саастаах оҕолорго аналлаах 20-лии миэстэлэрдээх 4 бөлөхтөөх.  Эбийиэк бары өттүнэн толору хааччыллыылаах: музыкальнай, спортивнай саалалардаах, мэдиссиинискэй кэбиниэттээх, көмпүүтэринэй кылаастаах.

«Березка» диэн оскуола иннинээҕи тэрилтэ сэбиэдиссэйэ  Ольга Солдатова быһааран эппитинэн,  саҥа оҕо саада үлэҕэ киирэн, Өлүөхүмэ куоракка оҕолору уһуйаан миэстэтинэн хааччыйыы боппуруоһа төрдүттэн быһаарыллыбыт. Санатар буоллахха, «Демография» национальнай бырайыак көмөтүнэн ааспыт үс сыл иһигэр өрөспүүбүлүкэ үрдүнэн 24 оҕо саада тутуллан үлэҕэ киирбит.

edersaas.ru

+1
0
+1
0
+1
0
+1
0
+1
0
+1
0
+1
0