Сүрүн Тыа хаһаайыстыбата

Өлүөхүмэҕэ үрүҥ ас арааһа астанар

Саха сирин Украинатынан аатырбыт өҥ сирдээх Өлүөхүмэ улууһа быйылгы курааҥҥа эмиэ оҕустарда.

edersaas.ru

Онон тыа сирин үлэһит дьоно, эти-үүтү оҥорон таһаарааччылар, үлэлэрин-хамнастарын өссө күүһүртүлэр. «Өлүөхүмэ кыладабыайа» ХЭТ Өлүөхүмэ куоратыгар астыыр кэмбинээттээх, Үҥкүргэ уонна Өлүөхүмэ Амматыгар ынах сүөһүнү иитэр хаһаайыстыбалаах, ону таһынан улууска кииннэммит соҕотуопсук буолан нэһилиэктэртэн үүт тутан астыыр.

Хаһаайыстыба астаабыт үрүҥ аһа: үүтэ, сүөгэйэ, чөчөгөйө, суората итиэннэ биллэн турар, сыыра, улуус иһигэр эрэ буолбакка, өрөспүүбүлүкэ олохтоохторугар бэркэ биһирэттэ, онон атыыга хамаҕатык барар.

— Билигин күҥҥэ 11 туонна үүтү астыыбыт, – диир хаһаайыстыба технолога Матвей Фокин. – Ити иһигэр 7,5 туонна үүт бэйэбит пиэрмэлэрбититтэн кэлэр, ордуга Бастакы Нөөрүктээйиттэн саҕалаан Улахан Муҥкуга тиийэ нэһилиэктэртэн аҕалыллар. Үүтү икки массыынанан таһабыт, суоппардарбыт Владислав Евстифеев уонна Виктор Шараборин үлэлэригэр эппиэтинэстээхтик сыһыаннаһар буоланнар, үүтү төрүт хойутаппаттар. Инньэ гынан үлэбит тиһигэ кэһиллибэт.

Үрүҥ ас арааһын астыыбыт, оттон ыраах сытар нэһилиэктэрбит арыылыыллар, олортон саамай элбэх үүтү, күҥҥэ 2,5 туоннаны, Кыыллаах Арыы сыаҕа астыыр. Бородууксуйабытын улууспут иһигэр итиэннэ ыаллыы Ленскэйгэ, Дьокуускайга илдьэн батарабыт.

Киин куоракка үс сиргэ: «Олоҥхо», «Мега» уонна «Мегас» эргиэн кииннэригэр дьоҕус фирменнэй маҕаһыыннаахпыт, кэмиттэн кэмигэр дьаарбаҥка оҥоробут.

Өлүөхүмэттэн Валерий Малышев, «Саха сирэ» хаһыат,  edersaas.ru саайтка анаан

0
0
Telegram @edersaas20