«Култуура» национальнай бырайыагынан Өлүөхүмэҕэ оҕо бибилэтиэкэтин саҥардан оҥордулар.
Федеральнай бырайыак иитинэн, тэрилтэҕэ өрөспүүбүлүкэ бүддьүөтүттэн өрөмүөҥҥэ уонна тэрийиигэ үп бэриллибит. Бу туһунан Улуус Медиа сырдаппыт.
—2019 сыллаахха тыа сиригэр модельнай бибилэтиэкэлэри оҥорорго куонкуруһу ааспыппыт, — диир нэһилиэктэр бибилэтиэкэлэрин түмэр биир тиһик бибилэтиэкэ дириэктэрэ Алена Хачатрян. – Ол түмүгүнэн 851 063,83 солк. бэриллибитэ, ол иһигэр өрөспүүбүлүкэ бүддьүөтүттэн 800 тыһ.солкуобай, олохтоох бүддьүөттэн 51 063,83 солкуобай.
Үп нэһилиэктэр бибилэтиэкэлэрин түмэр биир тиһиккэ киирэр куораттааҕы оҕо модельнай бибилэтиэкэтин саҥардан оҥорорго ыытыллыбыта. Оҕо бибилэтиэкэтигэр сыл устатыгар 3100-тэн тахса ааҕааччы сылдьар, кинигэ пуондата 24000 экземпляр. Манна түөрт бибилэтиэкэ үлэлиир. Саҥа форматка көһүүнэн уонна бибилэтиэкэ тупсарыллан, аныгы үйэ ирдэбилигэр эппиэттиир өҥөнү оҥорор кыах үөскээтэ.
Ааҕааччыларга анаан SMART-лаборатория аһылынна. Онно графическай планшеттартан саҕалаан, наушниктаах ноутбуктар, уопсайынан бары наадалаах барыта ылыллыбыта. Ону таһынан, бастакы мэндиэмэн толору саҥалыы тэрилиннэ, сенсорнай хостор, оҕо кумаҕынан уруһуйдууругар аналлаах хааччыллыбыт остуоллаах, истиэнэҕэ ыйанар тактильнай панель баар, остуол оонньуулара, 4D SMARТ оонньуулар, уо.д.а. оҕону сайыннарарга аналлаах элбэх.
Оҕо абонеменыгар миэбэл уларыйда. Уоскулаҥы биэрэр, санааны көтөҕөр өҥнөр туһанылыннылар. АРТ–зонаҕа ураты эйгэ тэрилиннэ: дьиэ эркинэ остуоруйа хартыыналарынан киэргэтиллибитэ болҕомтону тута тардар. Маны сэргэ, араас тиэмэлэринэн оҕолор уруһуйдарын быыстапкалара эмиэ баара кэрэхсэбиллээх. Ааҕар саалаҕа интерактивнай дуоскалар, компьютердаах остуоллар, стеллажтар, биир тылынан ааҕааччыга усулуобуйа толору тэрилиннэ.
Билигин, хоруона хамсыгынан, кинигэ ааҕыан баҕарааччылар төлөпүөннээн суруталлар. Кинигэни үлэһэллэр уонна болдьоммут күҥҥэ, чааска кэлэн ылаллар. Онон бары санитарнай ирдэбил тутуһуллар.
+1
+1
+1
+1
+1
+1
+1