Саха сиригэр маһы үүннэрэр бастакы питомник 2020 сыллаахха Өлүөхүмэ улууһун Солянка бөһүөлэгэр аһыллыбыта. Билигин тэрийээччилэр 4,2 гектардаах сиргэ аһаҕас халлаан анныгар 3 мөлүйүөнтэн тахса, онтон анал тэпилииссэҕэ 140 тыһыынчаттан тахса үүнүүнү олордор кыахтаахтар.
Питомникка билигин сүрүннээн бэһи үүннэрэллэр. Быйылгыттан саҕалаан мас атын көрүҥнэрин эмиэ олордон барыахтара. Санатан эттэххэ, бу бырайыагы Арктикатааҕы судаарыстыбаннай агротехнологическай университет Өлүөхүмэ улууһун дьаһалтатын кытары кыттыһан олоххо киллэрбитэ.
Университекка бу хайысханан аспираннары ылан үөрэппиттэрэ хаһыс да сыла буолла. Аспираннар техническэй наука доктора Игорь Григорьев салалтатынан ойуур хаһаайыстыбатыгар, чуолаан Саха сирин айылҕатын үөрэтиигэ, чөлүгэр түһэриигэ, научнай-чинчийэр үлэни ыыталлар. Кинилэр бэлиэтииллэринэн, Өлүөхүмэтээҕи маһы үүннэрэр анал сир көдьүүһэ аны икки-үс сылынан биллиэхтээх. “Бу питомник биһиги өрөспүүбүлүкэбитигэр бастакы уопут буолар. Бырайыак үтүө түмүктээх буоллаҕына, маннык анал сирдэр Саха сирин бары муннугар тэриллиэхтэрэ”, – диэн этэр ойуур комплексын уонна сири туһаныы факультетын декана Мария Слепцова.
Ил Дархан Айсен Николаев Саха сирин ойуурдарын чөлүгэр түһэриини ураты болҕомтотугар илдьэ сылдьар. Кини этэринэн, бастатан туран, манна наука быһаччы үлэлэһиэхтээх. “Ойуур хаһаайыстыбатыгар, айылҕабытын чөлүгэр түһэриигэ билиҥҥи үйэ сиэринэн аныгылыы көрүү наада. Баһаарга сиэниллибит тыабытын чөлүгэр түһэрии, маһы үүннэриигэ анал питомниктары тэрийии курдук сыал-сорук турар. Бу хайысхаҕа биһиги учуонайдарбыт, үрдүк үөрэхтэрбит кыһаларын көмөтө наада”, – диэн бэлиэтээн турар.
Аграфена КУЗЬМИНА