«Култуура» национальнай бырайыак чэрчитинэн, Өлүөхүмэ оройуонугар оҕо модельнай бибилэтиэкэтэ үлэҕэ киириэҕэ.
Ааспыт куонкуруска сүүмэрдээһини ааһан, судаарыстыбаттан көмөҕө тиксэн, оройуон оҕолорго аналлаах бибилэтиэкэтэ модельнай ааты сүгэр буолла. Сүрүн соругунан бибилэтиэкэҕэ ааҕааччылары угуйуу, айар дьоҕурдаахтарга киэҥ эйгэни үөскэтии буолар. Ол курдук, манна сынньанарга бары усулуобуйа баар. Аныгылыы информационнай уонна мультимедийнэй тэриллэргэ үлэлииллэр.
Бу бибилэтиэкэни тэрийии бырайыагар өрөспүүбүлүкэ бүддьүөтүттэн 800 тыһыынча солкуобай, улуус көмөтүнэн 51 063 тыһыынча харчы көрүлүннэ. Бибилэтиэкэҕэ Smart лаборатория, VR ачыкы, графическай планшеттар, интерактивнай дуоска, бырагыраама оҥорор роботтар о.д.а бааллар. Англ SMART диэн өйдөөх диэн тылбаастанар. Онон өйдөөх модельнай бибилэтиэкэ элбэх оҕону, ыччаты угуйуо буоллаҕа. Бибилэтиэкэ үөрүүлээх аһыллыыта алтынньы 28-31 күннэригэр былааннанар.
Ульяна Захарова.