Өлүөхүмэлэр хоккейдыыр былаһааккаланыахтара.
Бу күннэргэ сорох тэриллэрэ аҕалылынна, олору кулун тутартан туруорбутунан барыахтара. Оттон бэрэбиэркэтин күһүн эрэ ыытыахтара диэн UlusMedia.ru иһитиннэрэр.
Хоккейдыыр былаһаакка бырайыага 2019 сыллаахха сэтинньигэ «Гармония» култуура национальнай киинигэр олохтоох көҕүлээһини өйөөһүн бырагыраама иитинэн оҥоһуллан киллэриллибит. Бары наадалаах боппуруостар, тэрээһиннэр кэннилэриттэн, үлэни толоруунан, тэрили улууска аҕалыынан дьарыктаммыттар. Тендергэ Челябинскай тэрилтэтэ кыайбыт. Эпидемиологическай быһыы-майгы уонна оройуон ырааҕа учуоттанан, тэриллэр, корт Өлүөхүмэҕэ саҥа аҕалыллыбыттар.
«Былаһаакканы кулун тутарга оҥорор былааннаахпыт. Өҥөнү оҥорорго урбаанньыттары тардыахпыт, таҥас уларыттар, хаҥкы уларсар, итии утахтары атыылыыр сирдэр наада буолуохтара. Хоккейдыыр сир пааркаҕа оҥоһуллуо, онно волейболлуур, футболлуур сирдэр эмиэ бааллар«, — диэн кэпсээбит Өлүөхүмэ куоратын баһылыгын солбуйааччы Сергей Щебляков.
Хоккейдыыр сир бастаан утаа дьыл тымныы кэмигэр туһаныллыа. Кэлэр өртүгэр анал бүрүөһүнүнэн бүрүйдэхтэринэ, мини-футболлуур курдук оҥоһуллуо. Күүтүүлээх хоккейдыыр былаһааккаларын өлүөхүмэлэр быйыл күһүн, халлаан тымныйдаҕына эрэ боруобалаан көрүөхтэрэ.
Бырайыагы олоххо киллэрэргэ өрөспүүбүлүкэ уонна «Өлүөхүмэ куората» МТ, куорат олохтоохторо, урбаанньыттар өйөөбүттэр. Хоккейдыыр былаһаакканы (корт) ыларга, аҕаларга уонна монтажтыырга уопсайа мөлүйүөн үс сүүс тыһыынча барбыт.
+1
+1
+1
+1
+1
+1
+1