Сыл бүтүүтэ өрөспүүбүлүкэ бары улуустара сыллааҕы үлэ-хамнас түмүктэрин таһаараллар.
Өлүөхүмэҕэ улуус киинин дьаһалтатын актовай саалатыгар, үгэс курдук, үлэ бары эйгэтин бэрэстэбиитэллэрэ муһуннулар.
Кинилэри барыларын улуус баһылыга Николай Харбин уонна баһылыгы социальнай боппуруостарга солбуйааччы Оксана Саввинова эҕэрдэлээтилэр.
Баһылык, дойдуга барытыгар курдук, Өлүөхүмэҕэ судургута суох сыл ааспытын бэлиэтээн туран, сыл үтүө түмүктэрэ киһини үөрдэллэрин уонна инники сайдыыга көҕүлүүллэрин туһунан эттэ.
Ол курдук, пандемия хааччахтааһыннара киирбиттэрин да иһин, өрөспүүбүлүкэ устуоруйатыгар киирэр кэккэ дьаһаллар ыытылыннылар. Онно бастакынан Олоҥхо ыһыаҕын ааттыахха сөп.
«Олоҥхо ыһыаҕа биһиэхэ ыытыллан, элбэх ыалдьыт Өлүөхүмэни -– кини дьикти уонна улуукан айылҕатын, элбэх омук култууратын, устуоруйатын уонна аныгы көстүүтүн, ыалдьытымсах дьонун-сэргэтин саҥаттан арыйда. Бырааһынньык оройуон сайдарыгар саҥа тэтими биэрдэ», -– диэтэ.
Өссө биир үөрүүлээҕэ диэн, өлүөхүмэлэр өр сылларга күүппүт салгын тырааныспарын сырыытын олохтооһун туолла -– аэропортка саҥа көтөр-түһэр балаһа оҥоһулунна.
Сылы түмүктүүр үөрүүлээх күн улуус баһылыга бастыҥтан бастыҥнарга араас наҕараадалары туттарда.
Николай Харбин түмүккэ 2022 сылы Өлүөхүмэ улууһугар Эдэр, элбэх оҕолоох ыал сылынан биллэрдэ.
Надежда ЕГОРОВА, «Саха сирэ», edersaas.ru