Ханнык баҕарар улууска курдук, билиҥҥи тыҥааһыннаах, уустук кэмҥэ Өлүөхүмэ улууһун волонтердара хамнаһа суох, ол эрээри тугунан даҕаны кэмнэммэт көмөнү оҥоро сылдьаллар. Күн бүгүн улууска 106 волонтер үлэлиир.
“Биһиги оройуоммутугар волонтердар штабтара улуустааҕы култуура, ыччат, дьиэ кэргэн уонна спорт управлениетын ыччакка салаатын иһинэн кулун тутар бүтүүтэ суһаллык тэриллибитэ. Бастакы сайаапкалар номнуо киирэн барбыттара. Штабка ыччат, култуура, мэдиссиинэ, үөрэх тэрилтэлэрин волонтердара, Өлүөхүмэ улууһун норуоттарын ассамблеятын бэрэстэбиитэллэрэ, эдэр урбаанньыттар, биирдиилээн дьон киирдилэр. Бастатан туран, соҕотох олорор, саастаах, бэйэтэ атыылаһар, дьиэтиттэн тахсар кыаҕа суох дьоҥҥо көмөлөһөбүт.
Сайаапканы түргэнник толорор инниттэн управление массыынатын сыһыарбыппыт. Ону таһынан, бэйэлэрин массыыналарынан сылдьан дьуһуурустубалыыр волонтердар эмиэ бааллар. Дмитрий Константинов, Екатерина Бурлева, Татьяна Шараборина, Ксения Громова, Евгения Янкова, Зоя Жданова курдук үгүс уопуттаах баҕа өттүнэн көмөлөһөр, о.д.а. волонтердар кэккэлэрин хаҥаталлар.
Өлүөхүмэ куоракка 36 волонтер бэлиэтэниини ааспыта. Саппааска 40 волонтер баар. Нэһилиэк олохтоохторо эмиэ көмө эрэйэллэрин билэн, баһылыктары өйөөҥ диэн этии көтөхпүппүт. Күн бүгүн 70 волонтер дэриэбинэҕэ үлэлиир. Онон, уопсайа, Өлүөхүмэ улууһугар күннэтэ солбуйса сылдьан 106 волонтер көмө оҥорор. Ый курдук кэм устата 469 сайаапканы толордулар”, — диэн улуустааҕы култуура, ыччат, дьиэ кэргэн уонна спорт управлениетын начаалынньыга Анна Кубряк кэпсиир.
Өлүөхүмэ волонтердара сакааһынан аһылыгы, эми-тому тиэрдэн эрэ кэбиспэккэ, ыарыыттан сэрэхтээх буоларга сүбэлэри биэрэллэр, нэһилиэнньэ ортотугар өйдөтөр үлэни ыыталлар.
Людмила ПОПОВА, edersaas.ru