СӨ Бырабыыталыстыбатын Бэрэссэдээтэлин солбуйааччы Ольга Балабкина брифинг кэмигэр иһитиннэрбитинэн, балаҕан ыйын 29 күнүнээҕи туругунан, Уус Алдан улууһун быраастарын хонтуруолугар Лөгөй 1-кы нүөмэрдээх оскуолатын 22 үөрэнээччитэ – интэринээт иитиллээччитэ сытар. Оҕолору барыларын ыраахтан олорон үөрэниигэ көһөрбүттэр.
edersaas.ru
Интэринээт иитиллээччилэрэ бары суукканы эргиччи медиктэр кэтээн көрүүлэригэр сылдьаллар эбит. Уус Алдан улууһун мэдиссиинэтин тэрилтэтин үлэһиттэрэ табыгастаах дьаһалы ылбыттар диэн бэрэссэдээтэли солбуйааччы эттэ. Ону кытта, үөрэх тэрилтэлэригэр маннык түгэннэр хатыланыа суохтаахтар диэн бэлиэтээтэ. СӨ Үөрэҕин уонна наукатын министиэристибэтэ итиэннэ улуус баһылыктара хонтуруоллуохтаахтарын ыйар.
Өскөтүн, кылааска эбэтэр бөлөххө биир эмэ оҕо ыарыйдаҕына, бу кылаас эбэтэр бөлөх ыраахтан олорон (дистанционнай) үөрэххэ көһөрүн санатта. Өскөтүн, педагог эбэтэр хас даҕаны кылааска ыалдьыбыт дьон баара билиннэҕинэ, бу дьон бөлөҕүн дистанционнайга көһөрүү туһунан боппуруос көрүллэр диэн эттэ. Ольга Балабкина үөрэх доруобуйаҕа куттала суох барыахтааҕын ыйда.
“Саха сирэ” хаһыат, edersaas.ru