Whatsapp социальнай ситимигэр чопчу ааттара суруллубутах «Өлөөн улууһун Дьэлиҥдэ нэһилиэгин олохтоохторо» диэн илии баттааһыннаах ананонимнай иһитиннэрии тарҕаммыта.
edersaas.ru
Аата суох сурукка этиллэр балаһыанньа туһунан СӨ Доруобуйа харыстабылын пресс-сулууспата маннык быһаарда:
— Дьэлиҥдэ нэһилиэгэр тарҕаммыт сыстыганнаах дьаҥы бохсор үлэни ыытыыга эмчиттэр биригээдэлэрэ миэстэтигэр тиийэн үлэлиир. Хантаактаах дьону буллулар. Дьаҥы чэпчэкитик аһардар дьон дьиэлэригэр эмтэнэллэр. Орто уонна ыарахан туруктаах ыарыһахтары санитарнай авиациянан Өлөөннөөҕү киин балыыһаҕа аҕаллылар. Атырдьах ыйын 22 күнүгэр Дьэлиҥдэҕэ Дьокуускайтан тиийбит терапевт-бырааһы кытта өссө биир терпевт быраас, фельдшер уонна икки медицинскэй сиэстэрэ уонна алын сүһүөх медперсонал үлэлиир. Өлөөннөөҕү киин балыыһаҕа 20 инфекционнай куойка, икки улахан киһи ИВЛ уонна биир саҥа төрөөбүт оҕоҕо аналлаах аппарааттар бааллар. Икки аппарааты улуустааҕы дьаһалта атыыласпыт. Тэриллэр балаҕан ыйын саҥатыгар улууска тиэрдиллиэхтэрэ.
Онон бу күннэргэ Өлөөн улууһа Ковид-19 сыстыганнаах дьаҥы утары үлэ СӨ Доруобуйа харыстабылын министиэристибэтин уонна Роспотребнадзор управлениетын хонтуруолугар турар. Өлөөҥҥө пандемия саҕаланыаҕыттан 47 киһи сыстыганнаах дьаҥынан сутулунна. Онтон 38 түбэлтэ — Дьэлиҥдэҕэ. 47 лаборатория чиничийиитинэн коронавирустаабыт дьон: 12 — симптома суох, 35 — ыалдьыбыт киһи. 26 киһи ыараханнык пневмониялаата. Ол иһигэр 24 киһи — Дьэлиҥдэ олохтоохторо.
Уопсайа Өлөөн улууһугар ыарыы туруутун 7 төрүөтэ билиннэ: 6 — дьиэ кэргэнинэн, 1 — корпоративнай. Биллэн турар, бу төрүөт барыта СӨ Роспотребнадзор Управлениетын ирдэбилин кэһиини кытта ыкса сибээстээх.
СӨ Доруобуйа харыстабылын министиэристибэтэ Саха сирин бары олохтоохторун уонна ыалдьыттарын коронавирус пандемиятын бохсор ирдэбили барытын тутуһаргытыгар ыҥырар. Мааскаҕытын уонна бэрчээккэҕитин ханна да сырыттаргыт,умнумаҥ. Социальнай дистанцияны тутуһуҥ уонна араас мунньустар тэрээһиннэри ыытымаҥ эбэтэр онно кыттыһымаҥ диэн көрдөһөр.
Елена ПОТОЦКАЯ, «Саха сирэ» хаһыат, edersaas.ru