Норканы, саһылы, кырсаны биһиги тыйыс усулуобуйабытыгар хайдах иитэллэрий? Ол туһунан кэпсэтии Уус Алдан Найахытыгар ахсынньы 8 күнүгэр «Кыылы иитиигэ анаммыт олох» диэн кинигэни билиһиннэрии кэмигэр таҕыста.
edersaas.ru
СӨ тыа хаһаайыстыбатын үтүөлээх үлэһитэ Иван Сивцев олоҕун, кыылы иитиигэ уопутун үллэстибитин сырдатар кинигэни Мария Сергеева түмэн оҥорбут.
Иван Петрович тугунан да кэмнэммэт баай уопута, үтүөтэ өрөспүүбүлүкэҕэ кыылы иитээччилэр инники үлэлэригэр улахан төһүү буолар суолталаах. Ол туһунан өр кэмҥэ тыа хаһаайыстыбатын министиэристибэтигэр кыылы иитэр салаа отделын салайааччыта Владимир Сосин, СӨ Арктика судаарыстыбаннай кэмитиэтигэр үгэс буолбут хотугу салаалары сайыннарыы отделын начаалынньыга Иннокентий Баланов, ити тэрилтэ отделын салайааччыта Иннокентий Слепцов, Булуҥ улууһун баһылыгын солбуйааччы Денис Быдыгыев, Покровскайдааҕы кыылы иитэр пиэрмэ дириэктэрэ Максим Васильев, «Одуну» ХЭТ дириэктэрэ Клавдия Кривошапкина, Лүксүгүн нэһилиэгин кыылы иитэр пиэрмэтин бэрэстэбиитэлэ Светлана Аржакова, Найахы нэһилиэгин баһылыга Петр Сивцев уонна улуус тыатын хаһаайыстыбатын управлениетыттан Н.Н.Сивцев, Тулуна кыылы иитэр пиэрмэтэ сүһүөҕэр туран, өрөспүүбүлүкэҕэ бастыырыгар ахсаабат кыһамньытын ууран үлэлээбит, оччолорго САССР ТХМ Госплемрассаднигын күндү түүлээх кыылларга кылаабынай зоотехнига Ольга Постникова кыылы иитии, күндү түүлээх кыылы иитээччилэр санааларын, инники былааннарын тула дириҥ ырытыылаах кэпсэтиилэргэ кытыннылар.
Сопхуос саҕана пиэрмэ үлэһиттэрэ сопхуостан хамнастанан, кыыл аһылыгынан хааччыллан олорбут буоллахтарына, билигин судаарыстыба хаһан эмэ көмөлөһүө диэн эрэмньи санаанан аҕыйах бэриниилээх дьон кыылы иитиини эспэт мөккүөрдээх, көнньүнэн өлбүт сүөһүнэн, сылгынан аһатан баччаҕа кэлбиттэрэ ахтылынна.
Аҕатын дьыалатын эспэккэ салгыыр уола Иван Сивцев тутан олорор «Кылаан» пиэрмэтин норкаларын, саһылларын астына көрдүбүт.
Иван Сивцев олоҕун аргыһа Екатерина Дмитриевна сэрии саҕаттан кэргэнин кыылы иитиигэ бэлиэтээһиннэрин, отчуоттарын, килиэккэлээх кыыллары аһатыы рационун уратытын, мунньахтарга тыл этиилэрин, наҕараадаларын түмпүт бу кинигэ инникитин да тустаах тэрилтэлэр улахан биһирэбиллэрин ылыа итиэннэ күндү түүлээх кыылы иитиигэ методическай суолталаныа.
Тэрээһин мааны остуоллаах киэҥ-куоҥ сахалыы балаҕаҥҥа түмүктэннэ.
Лена ИВАНОВА, edersaas.ru саайтка анаан.