Дьокуускайга бэйдиэ барбыт ыттары, куоскалары тутар пууҥҥа кыыллар-сүөллэр өлөн сытар видеолара социальнай тиһиктэргэ тарҕанна.
“Ил Дархан Айсен Сергеевич Николаев пууҥҥа быһаарар үлэлэри ыытарга уонна сокуону кэһии чахчылара тахсыбыт буоллахтарына, буруйдаахтары миэрэҕэ тардарга эттэ.
Өрөспүүбүлүкэ баһылыгын сорудаҕынан, уопсастыбаннас бэрэстэбиитэллэрэ уонна суруналыыстар кыттыгастаах хамыыһыйа тэриллэр, — диэтэ СӨ Бырабыыталыстыбатын бэрэссэдээтэлин солбуйааччы Денис Белозёров.
Манна даҕатан эттэххэ, быйыл, олунньуга, СӨ ветеринария департаменын аадырыһыгар Дьокуускай куораттааҕы кыылы-сүөлү тутар пуунтан, кыыл-сүөл иирэн ыалдьыыта тахсыан сөптөөҕүн туһунан сайабылыанньа киллэриллибит. Кулун тутар 3 күнүгэр анаалыстар оҥоһуллубуттар уонна бу пууҥҥа баар биир ыкка ииримтийэн ыалдьыы вируһа көстүбүт.
Бу куталлаах ыарыыны өрөспүүбүлүкэҕэ тарҕаппат туһуттан, кэлимсэ миэрэлэр ылыллыбыттар. Сэрэтэр үлэлэр чэрчилэринэн, кыылы-сүөлү регистрациялааһын, хат регистрациялааһын үлэлэрэ көрүллүбүттэр. Вакцинация оҥоһуллубут уонна нэһилиэнньэҕэ өйдөтөр-быһаарар үлэлэр ыытыллыбыттар.
Ииримтийии вируһа олус кутталлаах. Ыалдьыбыт, сыстыбыт кыыл-сүөл силиттэн, ытырыытыттан киһи да, кыыл-сүөл да сыстыан сөп.
СӨ Ил Дарханын уонна СӨ бырабыыталыстыбатын пресс-сулууспата.
Хаартыска: depositphotos ылылынна.