Судаарыстыбаннай диэйэтэл, Саха АССР атыыга уонна бырамыысыланнаска норуодунай комиссара Андрей Бахсыров аатын Өлүөхүмэ улууһун Даппарай сэлиэнньэтин Кыыллаах орто оскуолатыгар иҥэрдилэр.
Аҕыйах хонуктааҕыта Өлүөхүмэ оройуонун Сэбиэтин уочараттаах сиэссийэтигэр, дьокутааттар биир санаанан Өлүөхүмэ улууһун Даппарай сэлиэнньэтин Кыыллаах орто оскуолатыгар Андрей Лаврентьевич Бахсыров аатын иҥэрэргэ куоластаатылар.
Андрей Бахсыров 1893 сыллаахха Өлүөхүмэ уокуругун Кыыллаах нэһилиэгэр төрөөбүтэ. Биллиилээх судаарыстыбаннай диэйэтэл туһунан кыраайы үөрэтээччи Иван Алексеев “Саха сирэ” хаһыат 2003 сыл олунньу 2 күнүгэр таһааттарбыт ыстатыйатыгар: “1920 сыллаахха Иркутскай куоракка баар Сибревком М.К.Аммосовы ыҥыран ылан Саха сиригэр баран сэбиэскэй былааһы тэрийэригэр сорудахтаабыта. Онон ити сыл кулун тутарыгар Аммосов Иркутскайга сылдьан аҕыс эрэллээх дьону, ол иһигэр А.Л.Бахсыровы ыҥыран ылан мунньахтыыр. 1921 сыллаахха алтынньы 31 күнүгэр Саха Автономнай Өрөспүүбүлүкэтэ кыраныыссаларын быһаарар. Конституционнай бырайыагын оҥорор хамыыһыйа мунньаҕа буолбута. Онно П.А.Ойуунускай бэрэссэдээтэллээбитэ, чилиэннэр ортолоругар А.Л.Бахсыров эмиэ баара. Эһиилигэр партия Саха сиринээҕи Губбюротун Президиумун мунньаҕа буолбута, онно П.А.Ойуунускай Саха сирин комиссардарын састаабын туһунан этиитэ ылыныллыбыта. Наркомпромторг наркомун солбуйааччытынан А.Л.Бахсыров анаммыта. Онон Ойуунускайдыын 20-с сыллар саҕаланыыларыттан ыла адьас ыкса, чугас сылдьан үлэлэспит.
1923 сыл тохсунньу 21 күнүгэр А.Л.Бахсыров промышленность уонна эргиэн народнай комиссарынан бигэргэтиллибитэ. Ити кэмҥэ саҥа Совнарком бэрэссэдээтэлинэн И.Н.Барахов талыллыбыта”, — диэн архыып докумуоннарыгар олоҕуран суруйар.
Бэрт таһаарыылаахтык үлэлии сырыттахтарына, эрэпэриэссийэ саҕаланар. Бахсыровы 1938 сыллаахха Иркутскайга сырыттаҕына туталлар. “Контрреволюционнай тэрилтэ кыттыылааҕа уонна тас судаарыстыба разведкатын агена” диэн хаайыллар. Итиэннэ 1941 сыллаахха суох буолар. Кини үтүө аата 1989 сыллаахха эрэ тиллэр.
Саха сирин сайдыытыгар кылаатын киллэрсибит Андрей Бахсыров аатын төрөөбүт дойдутун билиитин кыһатыгар – Кыллаах орто оскуолатыгар иҥэрэн үйэтиппиттэрэ хайҕабыллаах, суолталаах.
Людмила ПОПОВА, edersaas.ru
Хаартыска: СИА, Кыыллаах оскуолата.