Ахсынньы 15 күнүн “Үөрэх” национальнай бырайыак “Цифровой үөрэх эйгэтэ” бырагырааматынан анал кэбиниэттэри аһыы күнүнэн биллэрбиттэрэ. Бу күн Саха сирин үрдүнэн 102 үөрэх тэрилтэтэ тустаах бырагыраамаҕа холбонно. Өлүөхүмэ улууһуттан өрөспүүбүлүкэ куонкуруһун ааһан, А.Л. Бахсыров аатынан Кыыллаах орто оскуолата киирдэ.
Бэлиэ тэрээһин ыраахтан олорон (дистанционно) ыытылынна. Манна “Судаарыстыбаннай бэлиитикэни уонна РФ Үөрэҕириигэ министиэристибэтин үлэһиттэрин идэлэрин таһымын сайыннарыы академиятын” бэрэстэбиитэлэ Евгений Демьянов, СӨ үөрэҕин уонна наукатын миниистирэ Михаил Сивцев, Өлүөхүмэ улууһун баһылыгын социальнай боппуруостарга солбуйааччы Оксана Саввинова, улуустааҕы үөрэх управлениетын начаалынньыга Андрей Солдатов, Кыыллаах нэһилиэгин баһылыга Раиса Лавернова, А.Л. Бахсыров аатынан Кыыллаах орто оскуолатын дириэктэрэ Иннокентий Малгаров, о.д.а. кытыннылар.
Тустаах оскуола педагогтара цифровой үөрэхтээһини 2017 сылтан киллэрэн саҕалаабыттара. Өлүөхүмэ улууһун оскуолаларыттан аан бастакынан кумааҕы сурунаалтан аккаастанан, олоччу электроннай систиэмэҕэ көспүттэрэ. Улууска бу салааҕа биир бастыҥ көрдөрүүлээх.
“Цифровой үөрэх эйгэтэ” бырагыраама моделын олоххо киллэрэргэ анаан, биир үөрэх тэрилтэтигэр 1 элбэх функциялаах тэрил (МФУ), салайар үлэһиттэргэ 6 ноутбук, учууталларга 2 ноутбук, 2 интерактивнай комплекс, мобильнай кылааска анаан 30 ноутбук көрүлүннэ. Онтон “РФ цифровой экэниэмикэ” национальнай бырайыак “Информационнай инфраструктура” бырайыагын иитинэн 50 Мбиттан кырата суох интэриниэккэ холбонно.
СӨ Үөрэҕин уонна наукатын министиэристибэтэ иһитиннэрэринэн, былырыын бырайыакка 17 оскуола кыттыбыт, онтон быйыл 102 холбонно. Эһиил 119 үөрэх тэрилтэтин хабар былааннаахтар. 2023 сыл түмүктэниэр диэри бырайыакка барыта 405 үөрэх тэрилтэтэ, ол иһигэр 40 анал үөрэх тэрилтэтэ кыттыахтаах.
Людмила ПОПОВА, “Саха сирэ” хаһыат, edersaas.ru