Өлүөхүмэ улууһун Даппарай сэлиэнньэтин Кыыллаах орто оскуолатыгар билиҥҥитэ 171 оҕо үөрэнэр. Үөрэнээччилэр бу иннинэ аҥардастыы хортуоска хостооһунугар эрэ сылдьыбыт эбит буоллахтарына, быйыл күрүө тутуутугар эмиэ үлэлээтилэр диэн быйылгыттан оскуола дириэктэринэн анаммыт, “СӨ сыл бастыҥ учуутала-2015” аат хаһаайына, “Арассыыйатааҕы сыл бастыҥ учуутала-2016” куонкурус кыттыылааҕа Иннокентий Малгаров иһитиннэрдэ.
edersaas.ru
Ол курдук, “Өлүөхүмэ-агропродукт” ТХПК (бэрэссэдээтэл Ф.А.Романов) сиэмэ хортуосканан көмөлөһөн, В.А.Ощепков бааһынай хаһаайыстыбатын кытта бииргэ үлэлэһиигэ сөбүлэҥ түһэрсибит. Дуогабарга олоҕуран, Виссарион Андрианович оскуола хортуоскатын олордон, сайыны быһа көрөн-истэн биэрбит. Онон быйыл 7-11 кылаас үөрэнээччилэрэ 10-ча хонук хортуоска хостооһунугар итиэннэ орто, улахан кылаас уолаттара, оскуола кэлэктиибин эр дьоно күрүө тутуутугар үлэлээбиттэр. Инньэ гынан, уопсайа, 290 куул хортуоппуйдаммыттар.
“Үөрэнээччилэрбит кыстыгы туоруур хортуоскаларын буллубут. Сороҕун аны саас ыһарбытыгар сиэмэҕэ хаалларыахпыт. Ордубутун атыылыахпыт. “Аһаҕас адаптивнай оскуола” диэн бырагырааманан үлэлиибит. Оскуолабыт таһыгар моркуоп, сүбүөкүлэ ыспыппыт. Оҕолор бэйэлэрэ олордубуттара, көрбүттэрэ. Эһиилгиттэн үлэ лааҕырын аһан үлэлэтэр, эбии хаппыыста олордор былааннаахпыт. Билиҥҥитэ агро хайысхалаах оскуола буолбатахпыт эрээри, онно дьулуһабыт. Үөрэнээччилэрбит олус үлэһиттэр. Барыны-бары кыайа-хото туталлар”, — диэн Иннокентий Иннокентьевич сонунун үллэстэр.
Манна эбэн эттэххэ, эһиил Кыыллаах оскуолата төрүттэммитэ 155 сылын туолар. Онон сибээстээн, быйыл күһүн “Үйэлээх бэлэх” диэн бырайыак чэрчитинэн 155 маһы олордор былааннаахтар. Күн бүгүн, күһүҥҥү быраактыкаларыттан быыс булан, кэлэктиип эр дьоно “Газпром” хампаанньа 600 тыһ. солк. суумалаах бэлэх ууммут спортивнай былаһааккатын таҥаллар. Ити курдук, Кыыллаах оскуолатыгар үлэ күөстүү оргуйар, оҕону сир үлэтиттэн тэйиппэт туһугар иитэр үлэни ыытарга дьулуһаллар.
Людмила ПОПОВА, “Саха сирэ” хаһыат, edersaas.ru